اسلام آباد : وزیراعظم شہباز شریف نے اسٹاک ایکسچینج میں غیر معمولی اضافے پر قوم اور کاروباری برادری کو مبارکباد دیتے ہوئے کہا معاشی بحالی کے آثار نمایاں ہونا شروع ہوگئے ہیں۔
تفصیلات کے مطابق وزیراعظم شہباز شریف نے اسٹاک ایکسچینج میں غیرمعمولی اضافے پر قوم اور کاروباری برادری کو مبارکباد دیتے ہوئے پیغام میں کہا کہ ہماری محنت،درست پالیسیوں کے نتیجے میں معاشی بحالی کے آثار نمایاں ہوناشروع ہوگئے ہیں۔
شہباز شریف کا کہنا تھا کہ نوازشریف نے مہنگائی میں کمی،تعمیر وترقی کا سفر جہاں چھوڑا تھا، وہیں سےپھر آغازہو رہاہے ، ملک دوبارہ ترقی کے راستے پر گامزن ہو چکا ہے،مایوسی کے بعد امیدکا سورج طلوع ہو رہا ہے۔
وزیراعظم نے کہا کہ آئی ایم ایف سےاسٹاف لیول معاہدے سے سرمایہ کاروں کا اعتماد بحال ہو رہا ہے، خدا کرے کہ پاکستان کی ترقی کا سفر یوں ہی جاری رہے۔
انھوں نے بتایا کہ ترقی کے بیج جڑ پکڑنا شروع ہوگئے ہیں، پرخلوص محنت، دیانتداری اور سچائی ثمر لا رہی ہے، نوازشریف کے تعمیرو ترقی اور عوام کی خوشحالی کے وژن پر ایک بار پھر عمل پیرا ہیں، 2013 سے 2018 کے درمیان پاکستان کو توانائی بحران، دہشتگردی سےنجات دلائی تھی، معاشی ترقی لائےتھے،ایک بارپھراسی جذبے سے پاکستان کو ترقی کی راہ پر لارہے ہیں۔
شہباز شریف نے مزید کہا کہ قومی ترقی اور معاشی استحکام کے سفر کو اسی سمت اور اسی جذبے و محنت سے جاری رکھنا ہو گا، نوازشریف کی قیادت میں سی پیک کا آغاز کیا، معیشت بحالی، مہنگائی 4 فیصد اور کھانے پینے کی اشیا کی شرح 2 فیصد پر لائے تھے، ترقی کی شرح 6.1 فیصد، پالیسی ریٹ ساڑھے 6 فیصد پر تھا، اب دوبارہ ترقی کے اسی سفر کی طرف لوٹ رہے ہیں۔
وزیراعظم کا کہنا تھا کہ اب زراعت،آئی ٹی، صنعت سمیت دیگر تمام شعبوں میں ترقی کا سفر تیز ہو گا، عوام کو مہنگائی سے نجات دلائیں گے، نوجوانوں کے روزگار، کاروبار،معاشی خودمختاری سےہمکنار کریں گے۔
