اسلام آباد: حکومتی جماعت کے میڈیا سیل ملازمین کو تنخواہیں سرکاری خرچ پر دی جانے لگیں۔ پاکستان تحریک انصاف کے فواد چوہدری نے وفاقی سیکریٹری اطلاعات کو خط لکھ دیا۔
تفصیلات کے مطابق حکومتی جماعت کے میڈیا سیل ملازمین کو سرکاری ٹی وی اور پریس انفارمیشن ڈپارٹمنٹ کے ذریعے تنخواہوں کی ادائیگی کا انکشاف ہوا ہے۔
تحریک انصاف کے فواد چوہدری نے وفاقی سیکریٹری اطلاعات کو خط لکھ کر میڈیا سیل ملازمین کی تنخواہوں سے متعلق سوالات اٹھائے ہیں۔
خط میں کہا گیا کہ سابق وزیر اعظم نواز شریف کی صاحبزادی مریم نواز کی سربراہی میں حکومتی جماعت کا میڈیا سیل متحرک ہے۔ آرٹیکل 19 شہریوں کو معلومات تک رسائی کا حق فراہم کرتا ہے۔
خط میں سوال کیا گیا کہ سیکریٹری اطلاعات بتائیں ان افراد کو تنخواہیں کس کھاتے سے دی جا رہی ہیں۔ ’کیا یہ تاثر درست ہے کہ یہ افراد پی آی ڈی اور پی ٹی وی کے پے رول پر ہیں۔
فواد چوہدری کا کہنا تھا کہ مریم نواز کی سیکریٹری بیرون ملک منتقلی کے باوجود تنخواہ لے رہی ہیں۔ ’کیا یہ درست ہے نعمان، کائنات اور معظم نامی ملازمین پی ٹی وی کے پے رول پر ہیں۔ قاسم نامی شخص کو پریس انفارمیشن ڈپارٹمنٹ سے تنخواہ دی جاتی ہے‘؟
خط میں کہا گیا کہ گزارش ہے قانون کے تحت دستیاب مدت میں معلومات فراہم کریں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
