اسلام آباد: اسلام آباد ہائیکورٹ نے کراچی کی 6 یونین کونسلز میں دوبارہ گنتی کے عمل کو روکنے کا حکم دے دیا۔
تفصیلات کے مطابق کراچی کی 6 یونین کونسلز میں دوبارہ گنتی سے متعلق جماعت اسلامی کی درخواست پر اسلام آباد ہائیکورٹ نے حکم نامہ جاری کر دیا، تحریری حکم نامہ جسٹس سردار اعجاز اسحاق خان نے جاری کیا ہے۔
الیکشن کمیشن نے 22 مارچ کو جماعت اسلامی کی جیتی ہوئی 6 یونین کونسلز کے 17 پولنگ اسٹیشنز پر دوبارہ گنتی کا حکم دیا تھا، نائب امیر جماعت اسلامی کراچی نے اس حکم کو چیلنج کر دیا تھا، درخواست گزار کی جانب سے قیصر امام ایڈووکیٹ اور حسن جاوید شورش ایڈووکیٹ پیش ہوئے۔
عدالتی فیصلے کے مطابق پانچ یونین کونسلز کا کراچی ویسٹ اور ایک کا کراچی ایسٹ سے تعلق ہے، عدالت کو بتایا گیا کہ یونین کونسلز میں آج دوبارہ گنتی ہونی ہے، لیکن اگر آج گنتی ہو جاتی ہے تو یہ پٹیشن غیر مؤثر ہو جائے گی، اس لیے الیکشن کمیشن کو 29 اپریل کے لیے پری ایڈمیشن نوٹس جاری کیا جاتا ہے۔
عدالت نے یہ سوال بھی اٹھایا کہ کیا سندھ ہائیکورٹ کی بجائے اسلام آباد ہائیکورٹ میں یہ پٹیشن قابل سماعت ہے؟ عدالت نے درخواست قابل سماعت ہونے پر بھی 29 مارچ کو دلائل طلب کر لیے۔
یاد رہے کہ نائب امیر جماعت اسلامی راجہ عارف سلطان نے 17 جنوری پوسٹ پول دھاندلی کی شکایت کی تھی۔
