کراچی: شہر قائد مکمل طور پر لٹیروں کے رحم و کرم پر آ گیا، واردتیں کرتے ہوئے لٹیرے اب تھپڑ ما کر شہریوں کی مزید تذلیل بھی کرنے لگے ہیں۔
تفصیلات کے مطابق کراچی کے علاقے عزیز آباد بلاک 8 میں واقع ایک پکوان سینٹر میں ڈکیتی کی واردات کی سی سی ٹی وی فوٹیج سامنے آئی ہے، جس میں لٹیرے کو ایک نوجوان کو تھپڑ مارتے دیکھا جا سکتا ہے۔
فوٹیج کے مطابق ایک موٹر سائیکل پر سوار 2 لٹیرے پکوان سینٹر کے باہر پہنچے، ایک ڈاکو نے کاؤنٹر کے پاس کھڑے نوجوان کو زوردار تھپڑ رسید کر دیا، جب کہ دوسرے نے بریانی کے انتظار میں بیٹھے ایک اور کسٹمر کو لوٹا۔
جس نوجوان کو پہلے تھپڑ مارا گیا تھا، اس کا موبائل فون بھی چھین لیا گیا، لٹیروں کی جانب سے پکوان سینٹر کے ملازمین کو لوٹنے کی کوشش نہیں کی گئی، واردات کے دوران ایک لٹیرا مسلسل اپنے ہاتھ میں پستول تھامے کھڑا رہا۔
واردات کرنے والے دونوں لٹیرے شلوار قمیص میں ملبوس تھے، پولیس نے سی سی ٹی وی فوٹیج کی مدد سے لٹیروں کی تلاش شروع کر دی۔
