The news is by your side.

Advertisement

سعودی کابینہ کا اجلاس کیوں نہ ہوسکا؟ بڑی وجہ سامنے آگئی

ریاض : سعودی حکومت کی کابینہ کا ہفتہ وار اجلاس گزشتہ روز نہ ہوسکا، جس کی صدارت خادم حرمین شریفین شاہ سلمان بن عبد العزیز کرتے ہیں۔

تفصیلات کے مطابق سعودی عرب میں ہر منگل کو کابینہ کا ہفتہ وار اجلاس منعقد ہوتا ہے جس میں ہفتے بھر کے دوران ملکی اور بین الاقوامی امور کا جائزہ لیا جاتا ہے نیز اہم فیصلے بھی کیے جاتے ہیں۔

اس حوالے سے گزشتہ روز منگل کو کابینہ اجلاس نہیں ہوا اس کی وجہ بیان کرتے ہوئے سعودی ذرائع ابلاغ کا کہنا ہے کہ سعودی حکومت کی روایت رہی ہے کہ مملکت میں تین مختلف حالات میں کابینہ کا اجلاس منعقد نہیں ہوتا۔

اس کی پہلی اور دوسری وجہ یہ ہے کہ سعودی قواعد کے مطابق عید الفطر یا عید الاضحیٰ کی تعطیلات کے بعد آنے والے ہفتے میں کابینہ اجلاس نہیں ہوتا۔

اس کے علاوہ تیسری وجہ یہ بیان کی گئی ہے کہ سعودی بجٹ اجلاس کے بعد آنے والے پہلے ہفتے میں بھی کابینہ کا اجلاس منعقد نہیں ہوتا۔

یاد رہے کہ گزشتہ ہفتے خادم حرمین شریفین شاہ سلمان بن عبد العزیز کی سربراہی میں سعودی کابینہ نے مملکت کا بجٹ منظور کیا تھا، لہٰذا اس روایت پر عمل کرتے ہوئے رواں ہفتے اجلاس کا انعقاد نہیں کیا گیا۔

Comments

یہ بھی پڑھیں