ہمارے جسم میں الرجی کی علامات اس وقت پیدا ہوتی ہیں جب ہمارا قوت مدافعت کا نظام اپنے ماحول میں موجود چیز پر حملہ آور ہوتا ہے۔
اس صورتحال میں جلد کی سرخی، سوجن اور بہت خراب صورتحال میں الٹیاں، پیچش اور سانس لینے میں دشواری ہوتی ہے، بچوں کو عموماً خوراک کی مختلف اقسام سے بھی الرجی ہوتی ہے۔
اکثر لوگوں کو ہر سال موسم کی تبدیلی کے ساتھ ہی ہاتھ پیروں کی جلد پھٹنے یا جسم کے مختلف حصوں پر دھبوں کی شکایات رہتی ہے حالانکہ یہ مسئلہ اتنا سنجیدہ نہیں اور نہ ہی کسی قسم کی تکلیف کا باعث بنتا ہے کیونکہ عموماً لوگ گھریلو ٹوٹکوں سے ہی علاج کرلیتے ہیں تاہم اگر الرجی زیادہ بڑھ جائے تو اس کا باقاعدہ علاج کروانا ضروری ہے۔
جلد کی الرجی کے بارے میں ہر شخص کیلئے معلومات کا ہونا ضروری ہے تاکہ جلد کے عام دانے اور الرجی کا آسانی سے تعین کرکے اس کا علاج کیا جاسکے۔
الرجی الرجین (پیدا کرنے والے مادے) کی نمائش سے ہوتی ہے۔ مثال کے طور پر ایک ایسا کھانا جس سے آپ کو الرجی ہو بہت سی علامات کا سبب بن سکتی ہے، آپ اپنے منہ اور گلے میں کھجلی یا خارش کا تجربہ کرسکتے ہیں۔
الرجی کی علامات اور اقسام
یہ بات ذہن نشین رہے کہ کم و بیش مختلف علامات کے ساتھ جلد کی الرجی کی مختلف اقسام پائی جاتی ہیں جیسا کہ جلد کے مختلف حصوں میں جلن، لالی یا سوجن اور درد یا خارش کا ہونا۔
جلد کے دھبے سوجن، خارش اور خون بھی نکل سکتا ہے۔ الرجین کے ساتھ رابطے کے فوراً بعد جلد کے سرخ، خارش والے دھبے بن جاتے ہیں۔ الرجی کی وجہ سے گردن یا گلے میں جلن یا سوجن کا احساس ہوتا ہے۔
اس کے علاوہ آنکھوں میں پانی یا خارش ہوسکتی ہے جس کی وجہ سے وہ سوج جاتی ہیں، جلد کی جلن یا سوزش اور شدید دردناک احساسات اور خارش، یہ جلد کی الرجی کی سب سے عام علامات میں سے ہیں۔
الرجین کی عام اقسام:
جانوروں کی مصنوعات جن میں پالتو جانوروں کی خشکی، کیڑوں کا فضلہ اور کوڑا شامل ہے اور ادویات میں پینسلن اور سلفا دوائیں عام محرک ہیں۔
کھانے کی اشیاء میں گندم، گری دار میوے، دودھ اور انڈے عام الرجین جبکہ کیڑوں کے ڈنک ان میں شہد کی مکھیاں، بھڑ و مچھر وغیرہ شامل ہیں۔
کسی کھانے کا سڑنا یا ہوا سے پیدا ہونے والی پھپھوندی الرجک رد عمل کو متحرک کرسکتی ہے۔
مخصوص نباتات جن میں گھاس، جڑی بوٹیوں اور درختوں کے جرگوں کے ساتھ ساتھ پوائزن آئیوی اور پوائزن اوک جیسے پودوں سے خارج ہونے والی رطوبتیں پودوں کی الرجی کی عام وجوہات ہیں۔
دیگر الرجین میں لیٹیکس دستانے، کنڈوم اور نکل جیسی دھاتیں بھی عام الرجین ہیں۔
الرجی کا علاج اور احتیاط
اگر آپ کو لگتا ہے کہ آپ کو کھانے پینے کی کسی چیز سے الرجی ہے یا آپ کا معدہ اسے برداشت نہیں کر پاتا تو کسی ماہر ڈاکٹر سے چیک کروائیں۔ اگر آپ ڈاکٹر کو چیک کرائے بغیر کچھ کھانوں سے پرہیز شروع کر دیتے ہیں تو یہ آپ کے لیے نقصان دہ بھی ہو سکتا ہے کیونکہ اس طرح آپ کے جسم کو کچھ ضروری اجزاء جیسے کہ وٹامن اور پروٹین وغیرہ نہیں ملیں گے۔
جن لوگوں کو کھانے پینے کی چیزوں سے شدید الرجی ہے، ان کے لیے کوئی خاص علاج نہیں ہے، ماسوائے اس کے کہ وہ ان چیزوں سے مکمل پرہیز کریں جو الرجی کا باعث بنتی ہیں مگر جن لوگوں کو زیادہ شدید الرجی نہیں ہے یا جن کا معدہ کھانوں کی تھوڑی بہت مقدار برداشت کرسکتا ہے۔
وہ ان کھانوں کو کبھی کبھار اور تھوڑی مقدار میں استعمال کرسکتے ہیں، نیز بعض صورتوں میں ایک شخص کو مکمل طور پر یا کچھ عرصے کے لیے اس کھانے سے پرہیز کرنا پڑتا ہے جسے اس کا معدہ ہضم نہیں کر پاتا۔
