لاہور قلندر کے کپتان فاسٹ بولر شاہین شاہ آفریدی ایک بار پھر انجری مسائل کا شکار ہوگئے ہیں جس کے بعد ان کے اگلے میچ میں شمولیت پر سوالیہ نشان لگ گیا ہے؟
ایچ بی ایل پاکستان سپر لیگ سیزن 8 کا ابھی آغاز ہی ہوا ہے کہ بولرز کو انجری مسائل نے آگھیرا ہے۔ پہلے ملتان سلطانز سے شاہنواز ڈھانی انجرڈ ہوکر ٹورنامنٹ سے باہر ہوئے۔ پھر کراچی کنگز کے میر حمزہ پشاور زلمی کے خلاف میچ میں انگلی میں فریکچر کے باعث ٹورنامنٹ سے باہر ہوئے اور اب اطلاعات ہیں کہ لاہور قلندر کے کپتان شاہین شاہ آفریدی بھی انجری مسائل کا شکار ہوگئے ہیں۔
اے آر وائی نیوز کے مطابق شاہین شاہ فٹبال کھیلتے ہوئے کمر کی تکلیف میں مبتلا ہوئے ہیں جس کے بعد قلندر کپتان نے پریکٹس سیشن میں بھی حصہ نہیں لیا۔
اسٹار فاسٹ بولر کے اس طرح انجری مسائل سے دوچار ہونے کے باعث ان کے پی ایس ایل 8 کے اگلے میچ میں شمولیت پر سوالیہ نشان لگ گیا ہے جو کہ اتوار 19 فروری کو کراچی کنگز کے ساتھ نیشنل اسٹیڈیم میں کھیلا جائے گا۔
اس حوالے سے لاہور قلندر انتظامیہ کی جانب سے بھی کوئی بیان سامنے نہیں آیا ہے۔
واضح رہے کہ قومی ٹیم کے اسٹار فاسٹ بولر اور لاہور قلندرز کے کپتان شاہین شاہ آفریدی گزشتہ برس ٹی ٹوئنٹی ورلڈ کپ کے فائنل میں زخمی ہونے کے بعد کئی ماہ تک کرکٹ سے دور رہے تھے۔
یہ بھی پڑھیں: پی ایس ایل 8، آج کراچی کنگز اور اسلام آباد یونائیٹڈ کا جوڑ پڑے گا
شاہین شاہ نے حال ہی میں گھٹنے کی انجری سے چھٹکارا حاصل کیا تھا اور پی ایس ایل ان کا فٹ ہونے کے بعد پہلا اسائنمنٹ ہے۔
