اسلام آباد : ملک میں بجلی کا شارٹ فال 6000 میگا واٹ سے تجاوز کرنے کے بعد بجلی کابحران شدت اختیارکر گیا ہے ، جس کے باعث بڑے شہروں میں 8 گھنٹے بجلی کی لوڈشیڈنگ جاری ہے۔
تفصیلات کے مطابق ملک بھر میں گرمی میں اضافے کے ساتھ ہی بجلی کی لوڈشیڈنگ بڑھ گئی، ملک بھر میں بجلی کا شارٹ فال چھ ہزار سات سو پینسٹھ میگاواٹ ہوگیا۔
ذرائع پاور ڈویژن بتایا ہے کہ بجلی کی مجموعی پیداوار 20 ہزار 235 میگاواٹ، بجلی کی طلب 27 ہزار میگاواٹ ہے جبکہ پن بجلی کی پیداوار آٹھ ہزار میگاواٹ، نجی شعبے کے بجلی گھر سات ہزار میگاواٹ بجلی پیدا کررہے ہیں۔
ذرائع پاور ڈویژن کا کہنا تھا کہ ونڈپاورپلانٹس سےبجلی پیداوار1ہزار 2 سو25میگاواٹ ، سولر بجلی گھروں کی پیداوار 120 میگاواٹ ، بگاس سے 100 میگا واٹ اور نیوکلیئر پاور پلانٹس کی پیداوار 3ہزار2سو 70 میگاواٹ بجلی پیدا کی جارہی ہے۔
ذرائع نے کہا ہے کہ ملک بھر میں 8 گھنٹے تک لوڈ شیڈنگ کی جارہی ہے۔
دوسری جانب گرمی کی شدت بڑھنے سےآئیسکو میں بجلی کی طلب بڑھ گئی ، آئیسکو کا بجلی کا شارٹ فال 320 میگاواٹ تک پہنچ گیا ہے، آئیسکو ریجن میں بجلی کی موجودہ طلب 2ہزار 630 میگاواٹ ہے۔
ترجمان نے بتایا کہ نیشنل گرڈ سے آئیسکو کو 2ہزار 310 میگاواٹ بجلی فراہم کی جارہی ہے، ڈیمانڈ اور سپلائی میں فرق کے باعث 2 گھنٹے کی لوڈ مینجمنٹ کی جا رہی ہے،شدیدگرمی،حبس کی وجہ سے بجلی کے استعمال میں بے حد اضافہ ہواہے۔
ترجمان آئیسکو کا کہنا تھا کہ سسٹم پر لوڈ بڑھنے سے ٹرانسفارمرز اور فیڈرز کی شکایات بھی بڑھ گئی ہیں، صارفین سے درخواست ہے بجلی کے غیر ضروری استعمال سے اجتناب کریں۔
