ممبئی: بالی ووڈ کے معروف ہدایتکار اشونی دھیر کے بیٹے جلاج دھیر کی ممبئی میں کار حادثے میں موت ہو گئی۔
بھارتی میڈیا کے مطابق یہ واقعہ 23 نومبر کی صبح ولے پارلے میں ویسٹرن ایکسپریس ہائی وے پر پیش آیا جہاں بالی وڈ فلم ’سن آف سردار’ کے ہدایتکار اشونی دھیر کے 18 سالہ بیٹے جلاج دھیر خطرناک کار حادثے میں جاں بحق ہوگئے۔
بھارتی میڈیا کا کہنا ہے کہ جلاج دھیر اپنے ہم عمر تین دوستوں، ساحل میندھا، سارتھ کوشک اور جیڈن جمی کے ساتھ ڈرائیو پر گئے تھے، گاڑی ساحل چلا رہا تھا جو شراب کے نشے میں دھت تھا اسی دوران ایک ہوٹل کے قریب گاڑی دیوار سے ٹکرا گئی۔
حادثے میں فلم ساز کے بیٹے جلاج کے ساتھ ان کا ایک دوست، سارتھک کوشک بھی موقعے پر چل بسا جبکہ کار میں موجود دیگر دو افراد ساحل مینڈھااور جیڈن جمی شدید زخمی ہوئے ہیں۔
واضح رہے کہ ہدایتکار اشونی دھیر نے ’ اتیتھی تم کب جاوگے‘ اور ’سن آف سردار‘ جیسی فلموں کی ہدایتکاری کی ہے، جلاج اپنے والد کے ساتھ ان کی نئی فلم ’حساب برابر‘ کی گوا میں انٹرنیشنل فلم فیسٹیول آف انڈیا میں اسکریننگ کے لیے جانے والے تھے۔
