واشنگٹن: امریکی کمیشن برائے مذہبی آزادی کے سربراہ ڈیوڈ کری نے بھی بائیڈن سے مودی کیساتھ اقلیتوں کی مخدوش صورتحال اٹھانے کا مطالبہ کیا ہے۔
تفصیلات کے مطابق سربراہ ڈیوڈ کری نے کہا کہ امریکا کو بھارتی حکومت سے اقلیت کش اقدامات کی مذمت کرنی چاہیے، مودی سرکار امتیازانہ قوانین سے اقلیتوں کی مذہبی آزادی سَلب کر رہی ہے۔
ڈیوڈ کری کا کہنا تھا کہ مذہب تبدیل کرنے کی پابندی، شہریت کے قوانین انتہا پسند ہندوستان بنانے کے اقدامات ہیں۔
واضح رہے کہ 2020 سے امریکی کمیشن مذہبی آزادی اقلیتوں سے ناروا سلوک پر تشویشناک ملک کا درجہ دینے کا مطالبہ کر رہا ہے، 15 جون کو سی جے پی نے امریکی حکومت سے بھارت میں بگڑتی صحافتی صورتحال پر مذمت کا مطالبہ کیا تھا۔
دوسری جانب ہیومن رائٹس واچ ایشیا کے ڈائریکٹر نے بھی انسانی حقوق پامالیوں کا معاملہ اٹھانے کا مطالبہ کر رکھا ہے۔
امریکی محکمہ خارجہ نے بھی انسانی حقوق کی رپورٹ میں بھارت میں انسانی حقوق کی صورتحال کو سنگین قرار دیا تھا۔
گزشتہ سال مودی کیخلاف ڈاکومنٹری نشر کرنے پر بی بی سی انڈیا کے دفاتر پر چھاپے مارے گئے تھے، 2020 میں بھی ایمنسٹی انٹرنیشنل نے حکومتی دباؤ کے مدنظر بھارت میں کام بند کردیا تھا۔
