کراچی : قومی ایئرلائن کی لاہور سے کراچشی جانے والی پرواز کے کارگو کنٹینر کے ہُک ڈھیلے رہ گئے جس کے باعث طیارہ بڑے حادثے کا شکار ہوسکتا تھا جب لاہور سے ملتان جانے والی نجی ایئرلائن کی پرواز سے پرندہ ٹکرا گیا دونوں واقعے میں طیاروں کو بہ حفاظت اتار لیا گیا۔
تفصیلات کے مطابق کارگو گراؤنڈ ہیڈلنگ عملے کی سنگین غلطی کا شکار لاہور سے کراچی آنے والی پرواز پی کے 305 بنی جس کے پچھلے حصے کو جزوی نقصان بھی پہنچا ہے تاہم خوش قسمت طیارہ کسی بڑے حادثے سے محفوظ رہا
تاہم دورانِ پرواز کارگو کنٹینر ہلتے رہے جس سے جہاں طیارے کو معمولی نقصان ہوا تو وہیں مسافر بھی خوف کا شکار رہے تاہم طیارہ کا کپتان پرواز کو کراچی ایئرپورٹ پر بحفاظت لینڈ کرانے میں کامیاب رہے
ترجمان پی آئی اے نے دورانِ پرواز سامان ہلنے سے مسافروں کی جان کو خطرے میں ڈالنے کا نوٹس لیتے ہوئے کہا کہ طیارے کو پہنچنے والے نقصان کا جائزہ لے رہے ہیں اور معائنے کے بعد جہاز پرواز کے قابل ہوا تو اگلی فلائیٹس کے لیے استعمال کیا جائے گا اور ذمہ داروں کے خلاف محکمانہ تادیبی کارروائی کی جائے گی
دوسری جانب لاہور سے ملتان جانے والا نجی چارٹر طیارہ بھی ایک بڑے ممکنہ حادثے سے اُس وقت بال بال بچ گیا جب ٹیک آف کے کچھ دیر بعد طیارے کی ونڈ اسکرین سے پرندہ ٹکرا گیا جس سے ونڈ اسکرین ٹوٹ گئی اور پرندہ طیارے میں جا گھسا جس کے باعث پائیلٹ معمولی زخمی ہوگیا تاہم حاضر دماغی کا مظاہر کرتے ہوئے جہاز کو بہ حفاظت اتار لیا گیا
