کراچی : ملیر سکھن میں عید کے دوسرے روز ڈکیتی مزاحمت پر دو افراد کو قتل کردیا گیا ، جاں بحق ہونے والا حاجی یونس پاکستانی نژاد برطانوی شہری نکلا۔
تفصیلات کے مطابق کراچی کے علاقے ملیر سکھن میں کلاشنکوف بردار ملزمان کی ڈکیتی وارداتوں میں اضافہ ہوگیا، عید کے دنوں میں ڈکیتی کے دوران سالے بہنوئی کو گولیاں مار کر قتل کیا گیا۔
ڈکیتی مزاحمت پر قتل ہونے والا حاجی یونس پاکستانی نژاد برطانوی شہری تھا، مقتول زاہد قریشی کے بھائی خالد قریشی نے اے ار وائی نیوز سے گفتگو میں بتایا کہ زاہد قریشی بھائی اور حاجی یونس بہنوئی تھا، 8 ڈکیتی کے لیے آئے تھے،کلاشنکوف ودیگرہتھیاروں سے لیس تھے۔
مقتول کے بھائی نے کہا کہ ڈکیتی کے دوران مزاحمت پر ملزمان نے بھائی اور بہنوئی پر فائرنگ کی ، فائرنگ سے بھائی زاہد اور بہنوئی حاجی یونس شدید زخمی ہوئے زخمی زاہد وقوع کے روز انتقال کرگئے جبکہ حاجی یونس کا انتقال گذشتہ روز ہوا۔
خالدقریشی کا کہنا تھا کہ مقتول زاہد کو ایس ایم جی کی ایک گولی، یونس کو 9 ایم ایم کی 2 گولیاں لگیں، یونس عید منانے برطانیہ سے پاکستان آئے تھے۔
دوسری جانب واقعے پرتھانیدار اور ایس آئی او کو معطل کردیا گیا، ایس ایس پی ملیر حسن سردارکا کہنا ہے ابھی تک کلاشنکوف کےذریعے واردات ثابت نہیں ہوئی تاہم معاملے کی تحقیقات کررہے ہیں۔
