امریکی ریاست لوزیانا میں یومِ آزادی کی تقریب میں آندھا دھن فائرنگ سے چار افراد ہلاک اور سات زخمی ہو گئے۔
غیر ملکی میڈیا رپورٹ کے مطابق امریکی ریاست لوزیانا میں یومِ آزادی کی تقریب میں جدید اسلحے سے آندھا دھن فائرنگ کے واقع میں 4 افراد ہلاک اور 7 زخمی ہو گئے۔
پولیس کا کہنا ہے کہ مسلح حملہ آور نے جدید اسلحے سے 100 کے قریب لوگوں پر اندھا دھند فائرنگ کر دی، فائرنگ کے نتیجے میں 2 افراد موقعے پر ہی ہلاک ہو گئے، تیسرے نے زخموں کی تاب نہ لاتے ہوئے اسپتال میں دم توڑا جبکہ چوتھے کی لاش جائے حادثہ کے قریب سے ملی۔
امریکی مقامی پولیس کا کہنا ہے کہ فائرنگ کی وجوہات کا تعین کیا جارہا ہے جبکہ تاحال کسی کو گرفتار نہیں کیا گیا ہے۔
واضح رہے کہ یوم آزادی پر دارالحکومت واشنگٹن ڈی سی سمیت 13 ریاستوں میں فائرنگ کے واقعات پیش آئے، جن میں مجموعی طور پر 15 افراد کی جانیں گئیں، اور 94 شہری زخمی ہوئے جن میں خواتین اور بچے بھی شامل ہیں۔
رواں برس کے ابتدائی 111 دن میں پیش آنے والے 17 ہلاکت خیز واقعات میں 85 افراد ہلاک ہو چکے ہیں جب کہ ہر واقعے میں حملہ آوروں نے جدید اسلحہ استعمال کیا۔
