پاکستان ٹیم کے تھنک ٹینک نے آئی سی سی کرکٹ ورلڈکپ کے لیے 12 سے 13 پلیئرز کے ناموں پر اتفاق کرلیا ہے۔
ذرائع کے مطابق پاکستان کرکٹ ٹیم کا تھنک ٹینک نئے چیف سلیکٹر کی تعیناتی کا انتظار کررہا ہے، چیف سلیکٹر کی تعیناتی کے بعد قومی ٹیم کے اسکواڈ کو حتمی شکل دیدی جائے گی۔
ذرائع کا کہنا ہے کہ ورلڈکپ کی ٹیم کے حوالے سے گرانٹ براڈ برن، مکی آرتھر، قومی ٹیم کے کپتان بابراعظم اور حسن چیمہ میں ابتدائی مشاورت کرلی گئی ہے۔
اطلاعات کے مطابق تھنک ٹینک نے بابر اعظم، فخر زمان، امام الحق، محمد رضوان، شاداب خان، حارث روف، نسیم شاہ، شاہین آفریدی اور آغا سلمان کے ناموں پر اتفاق کیا ہے۔
ورلڈ کپ سے قبل افغانستان سیریز اور ایشیا کپ کے دوران اسکواڈ کو حتمی شکل دی جائے گی، ورلڈ کپ اسکواڈ کے لیے شان مسعود، عبداللہ شفیق، سرفراز احمد، سعود شکیل، محمد حارث اور طیب طاہر میں سے دو کھلاڑیوں کے نام فائنل کئے جائیں گے۔
ذرائع کا کہنا ہے کہ ٹیم کا حتمی فیصلہ چیف سلیکٹر کرے گا، نئے چیف سلیکٹر کی تقرری کے بعد تھنک ٹینک اپنی تجاویز ان کے سامنے رکھے گا۔
