کراچی: دنیا کی سب سے بڑی ویڈیو شیئرنگ سائٹ نے گوگل کے اشتراک سے پاکستان میں اپنی باضابطہ سروس شروع کرنے کا اعلان کردیا جس کے ذریعے صارفین کو پیسے کمانے کا موقع بھی فراہم کیا گیا ہے۔
تفصیلات کے مطابق کراچی کے ڈی ایچ اے گالف کلب میں ایک تقریب کا انعقاد کیا گیا جس میں گوگل ایشیاء پیسفک کے انڈسٹری کے ہیڈ خرم جمالی نے پاکستان میں یوٹیوب ڈاٹ کام ڈاٹ پی کے کی سروس باضابطہ شروع کرنے کا اعلان کیا۔
تقریب سے خطاب کرتے ہوئے خرم جمالی نے کہا کہ ’’پاکستان میں علی گُل پیر سمیت کئی ایسے فنکار موجود ہیں جنہوں نے اپنا کیریئر یوٹیوب سے شروع کیا اور کامیابیوں کا سفر طے کرتے ہوئے آج وہ شہرت کی بلندیوں کو چھو رہے ہیں‘‘۔
انہوں نے بتایا کہ ’’فنکاروں کی جانب سے ویڈیوز ریکارڈ کر کے یوٹیوب پر ڈالی گئی تھیں جس کے بعد صارفین نے انہیں دیکھا اور فنکاروں کی صلاحیتوں کے گرویدہ ہوگئے۔ اُن کا کہنا تھا کہ اب پاکستان میں ہنر مند افراد اپنی ویڈیوز یوٹیوب پر پبلش کر کے اُس سے کمائی حاصل کرسکتے ہیں‘‘۔
خرم جمالی نے اس امید کا اظہار کیا کہ اس پروگرام اور سروس کے آنے کے بعد پاکستان کا مزید ٹیلنٹ ابھر کر سامنے آئے گا اور دنیا میں ملک کا نام روشن کرتے ہوئے اپنی تخلیقی صلاحیتوں لوگوں کے دلوں میں جگہ بنائیں‘‘۔
سروس کی خصوصیات بیان کرتے ہوئے میزبان خرم جمالی نے کہا کہ اب انٹرنیٹ کے معروف سرچ انجن اور ویڈیو شیئرنگ کی ویب سائٹ کے اشتراک کے ذریعے صارفین یوٹیوب پی کے پر چینل بنا کر ایڈ سینس کے ذریعے کما سکتے ہیں۔
اس موقع پر گوگل ایشیاء پیسیفک کی رکن تانیہ نے کہا کہ ’’پاکستان میں انٹرنیٹ کی تھری جی اور فور جی سروس کی فراہمی کے باوجود انٹرنیٹ کی سہولت بہت خراب ہے اور لوگوں کو ویڈیوز دیکھنے میں بہت پریشانی کا سامنا کرنا پڑتا ہے۔
انہوں نے کہا کہ پاکستان میں خراب انٹرنیٹ سروس کو پیش نظر رکھتے ہوئے صارفین کی مشکلات دور کرنے کی کوشش کی گئی ہے، جس کے تحت یوٹیوب استعمال کرنے والے افراد کے لیے آف لائن فیچر بھی متعارف کروایا گیا ہے۔
اس موقع پر شاندار تقریب کا انعقاد کیا گیا تھا جس میں مختلف شعبہ ہائے زندگی سے تعلق رکھنے والے افراد نے شرکت کی، مہمان گرامی کو محظوظ کرنے کے لیے مختلف میوزیکل بینڈز اور فنکاروں نے اپنے فن کا مظاہرہ بھی کیا۔
آف لائن فیچر کی افادیت بیان کرتے ہوئے پیسیفک ایشیاء کے رکن خرم نے کہا کہ ’’اس فیچر کے ذریعے صارف کسی بھی ویڈیو پر کلک کر سکتا ہے اور انٹرنیٹ سروس نہ ہونے کی صورت میں بھی اُس ویڈیو کو دیکھ سکتا ہے‘‘۔
واضح رہے کہ پاکستانی تاریخ میں یوٹیوب کی جانب سے اس طرز کا پہلا فیچر متعارف کروایا گیا ہے جس کے ذریعے مقامی افراد کو پیسے کمانے کی سہولت دی گئی ہوں، کوئی بھی شخص جو یوٹیوب کا صارف ہے وہ اپنے اکاؤنٹ کو ایڈسینس سے منسلک کر کے اشتہارات کے ذریعے حاصل ہونے والی آمدنی سے اپنا حصہ حاصل کرسکتا ہے تاہم کوئی بھی صارف کم از کم 100 ڈالر آمدنی کے بعد ہی اپنے حصے کو نکال سکتاہے۔
پاکستان میں یوٹیوب کی بندش کے بعد بحالی سے اس کے صارفین میں بے پناہ اضافہ دیکھنے میں آیا ہے جس کی پیش نظر گوگل نے پاکستانیوں کے لیے یوٹیوب نے مادری زبان اردو کا ورژن متعارف کروادیا ہے۔
