اسلام آباد: وفاقی وزیرِ پانی و بجلی خواجہ آصف نے پاکستان تحریکِ انصاف کو مہنگی بجلی اور شارٹ فال کا ذمہ دار ٹہرا دیا، خواجہ آصف کا کہنا ہے کہ تیل کی مخصوص لابی سستی بجلی کے حصول کی راہ میں روکاوٹیں پیدا کر رہی ہے۔
اسلام آباد میں پریس کانفرنس کےدوران خواجہ آصف نے کہا کہ سیاسی مقاصد کیلئے ملک کو اربوں روپے کا نقصان پہنچایا گیا اور دھرنوں سے ایسےحالات پیدا کئے گئے، جس سے چینی صدر کا دورہ ملتوی ہوا۔
انھوں نےکہا کہ تیل کی مخصوص لابی سستی بجلی پیداوار کی راہ میں روکاٹیں حائل کر رہی ہے،اس وقت حکومت تھرمل بجلی پرسو فیصد سبسڈی دے رہی ہے، دس ہزار میگاواٹ کے سستی بجلی کے منصوبوں میں تعطل ڈال کر ملک سے دشمنی کی گئی۔
خواجہ آصف کا کہنا تھا کہ چندعناصر دھرنوں کےذریعے پاک چین تعلقات خراب کرکے دشمن کو فائدہ پہنچانا چاہتے ہیں، خواجہ آصف نے بتایاکہ آئندہ ماہ پاکستان اور چین کےدرمیان کول پاور پلانٹس کے مننصوبوں پر دستخط ہوجائیں گے۔
خواجہ آصف کا کہنا تھا کہ نیپرا نے ٹیرف سے متعلق پی ٹی آئی کی پٹیشن غلط اعداد وشمار ہونے کے باعث مسترد کر دی، انھوں نے مزید کہاکہ معاشی بہتری کیلئے پالیسوں میں استحکام ضروری ہوتا ہے۔
