اوٹاوا: اسمارٹ فون ٹیکنالوجی میں شمار ہونے والی کمپنی بلیک بیری اب اپنا فون بیچنے کیلئے صارفین کو رقم کا لالچ دینے پر مجبور ہوگئی ہے، کمپنی نے ستمبر میں اپنا تازہ ترین سمارٹ فون بلیک بیری پاسپورٹ متعارف کروایا لیکن گاہکوں کی دلچسپی میں کمی دیکھ کر اب ایک انوکھی پیشکش کردی ہے۔
ایپل کمپنی کے صارفین کو بلیک بیری کی طرف سے تیرہ فروری تک یہ موقع دیا گیا ہے کہ وہ اپنے ایپل فون کے بدلے بلیک بیری پاسپورٹ خرید سکتے ہیں اور اس پر صارفین کو 400 ڈالر (تقریباً 40000 پاکستانی روپے) تک دیئے جاسکتے ہیں جبکہ 150 ڈالر (تقریباً 15000 پاکستانی روپے) کا گفٹ کارڈ بھی مل سکتا ہے۔
بلیک بیری کمپنی پچھلے کچھ عرصہ سے بھاری خسارے کا سامنا کررہی ہے اور خصوصاً سام سنگ اور ایپل نے اس کی آمدنی کو سخت دھچکہ لگایا ہے، جس سے سنبھلنے کی بھرپور کوشش کی جارہی ہے۔
