لاس اینجلس : دنیا بھر کے سب سے بڑے آسکر ایوارڈ میں فلم برڈ مین چھائی رہی، جس نے بہترین فلم سمیت تین ایوارڈ ز حاصل کئے، بہترین اداکارہ جولیان مور جبکہ ایڈی ریڈمائن بہترین اداکار قرار پائے۔
آسکر کے ریڈ کارپٹ پر حسیناوں نے پر کشش لباس پہن کر سب کے دل جیت لئے، لیڈی گاگا،جنیفر لوپیز ،کیٹ بلانچٹ حسین نظر آئیں تو شوخ رنگوں کے انتخاب کے لئے مشہور اداکارہ لوپیٹا کے سفید لباس نے سب کو متوجہ کیا۔
دنیا کے سب سے بڑے فلمی اعزاز کا رنگارنگ میلہ لاس انجلس میں سجا، جس میں دنیا بھر سے آئے فلمی ستاروں کی کہکشاوں نے میلہ لوٹ لیا۔ آسکر کی جگمگاتی شام ایکشن فلم برڈ مین کے نام ہوئی، جس نے بہترین فلم کے ایوارڈ کیساتھ بہترین ہدایتکار اور اسکرین پلے کا ایوارڈ حاصل کیا۔
سال دوہزار پندرہ کیلئے بہترین اداکار کا ایوارڈ ایڈی ریڈ مائن نے تھیوری آف ایوری تھنگ کیلئے جیتا جبکہ فلم اسٹل ایلس میں بہترین اداکاری پر جولیان مور کو ایوارڈ دیا گیا۔
تقريب میں ايوارڈز کی بارش فلم دی گرینڈ بڈاپسٹ ہوٹل پر ہوئی، جس نے چار ایوارڈز اپنے نام کئے۔
بوائے ہڈ کی پیٹریشیا ایرکوئیٹ بہترین معاون اداکارہ جبکہ وپلیش کیلئے جے کے سائمنز بیسٹ معاون اداکار ٹھہرے۔
بہترین اینی میٹڈ فلم کا اکیڈمی ایوارڈ بگ ہیرو سکس لے اڑی۔ بہترین گانے کا آسکرایوارڈ فلم سیلما کے گانے گلوری کو دیا گیا۔
