آئی ایس پی آر نے سینیئر صحافی اور نامور اینکر ارشد شریف کی کینیا میں ناگہانی وفات پر گہرے دکھ کا اظہار کیا ہے۔
ترجمان آئی ایس پی آر کے جاری بیان میں کہا گیا ہے کہ ارشد شریف کی کینیا میں ناگہانی وفات پر گہرا دکھ ہے، اللہ تعالیٰ ارشد شریف کے درجات کو بلند کرے۔
آئی ایس پی آر کا کہنا ہے کہ دکھ کی گھڑی میں اللہ تعالیٰ ارشد شریف کے لواحقین کو صبر جمیل عطافرمائے۔
واضح رہے کہ گزشتہ شب سینیئر صحافی اور اینکر ارشد شریف کینیا کے شہر نیروبی کے قریب ایک حادثے میں گولی لگنے سے جاں بحق ہوگئے۔
ان کی شہادت کی خبر اے آر وائی پر نشر ہوتے ہی ٹوئٹر پر ٹاپ ٹرینڈ بن گئی جب کہ پی ایف یو جے کی جانب سے حکومت سے واقعے کی مکمل تحقیقات کرانے کا مطالبہ کیا ہے اور ارشد شریف کے انتقال پر تین روزہ سوگ کا اعلان بھی کیا گیا ہے۔
یہ بھی پڑھیں: ارشد شریف کی شہادت کی خبر ٹوئٹر پر ٹاپ ٹرینڈ بن گئی
وزیراعظم شہباز شریف، وزیر خارجہ بلاول بھٹو، وزیر داخلہ رانا ثنا اللہ، وفاقی وزرا، پی ٹی آئی رہنماؤں سمیت دیگر سیاسی رہنماؤں نے ان کی شہادت پر گہرے دکھ اور افسوس کا اظہار کیا ہے، تحریک انصاف نے سینیئر صحافی کا جسد خاکی وطن لانے اور شفاف تحقیقات کا مطالبہ کیا ہے۔
دوسری جانب حکومت پاکستان نے ارشد شریف کے قتل سے متعلق حقائق جاننے کے لیے کینیا کی حکومت سے رابطہ کرلیا ہے۔
