کراچی: ڈاؤ میڈیکل کالج کے 1996 کے پاس آؤٹ طلبہ نے سول اسپتال میں پیڈیاٹرک سرجری اوٹی کمپلیکس قائم کر دیا ہے، صوبائی وزیر صحت نے سندھ حکومت کی جانب سے اخراجات برداشت کرنے کا اعلان کر دیا۔
تفصیلات کے مطابق صوبائی وزیر صحت ڈاکٹر عذرا پیچوہو نے آج جعمہ کو سول اسپتال کراچی میں بچوں کے سرجری اوٹی کمپلیکس کا افتتاح کیا، یہ یونٹ ڈاؤ میڈیکل کالج کے سابق طلبہ نے عطیہ کیا، وزیر صحت نے اعلان کیا کہ اس یونٹ کے اخراجات حکومت سندھ برداشت کرے گی۔
انھوں نے کہا کہ سول اسپتال کراچی کے علاوہ بھی بچوں کے سرجری اوٹی کمپلیکس کا ایک منصوبہ زیر غور ہے، جس کے لیے حکومت سندھ کو کہیں اور جگہ درکار ہے، کیوں کہ سول اسپتال کراچی میں اب مزید جگہ دستیاب نہیں ہے۔
تقریب میں ڈاؤ کلاس 96 کے نمائندوں نے صوبائی وزیر صحت کے ہمراہ نئے پیڈیاٹرک اوٹی کمپلیکس کی علامتی چابی میڈیکل سپرنٹنڈنٹ سول اسپتال کراچی ڈاکٹر روبینہ بشیر کے حوالے کی۔
ڈاؤ کے تعاون سے سول اسپتال میں بچوں کے کارڈیالوجی وارڈ کا افتتاح ہو گیا
ڈاکٹر عذرا پیچو نے کہا ڈاؤ کے سابق طالب علم اپنی مادر علمی کی قدر کرتے ہیں اور اسے کچھ نہ کچھ ضرور دیتے ہیں، گزشتہ روز کلاس 97 نے پیڈز کارڈیالوجی کا نیا ایچ ڈی یو وارڈ بنایا تھا، آج ڈاؤ کلاس 96 نے او ٹی کمپلیکس بنا کر دیا۔