کراچی : سندھ کے دارالحکومت میں کراچی پولیس آفس پر حملے کے بعد سرکاری عمارتوں اور تنصیبات پر سیکیورٹی انتظامات پر سوالیہ نشان لگ گئے تھے۔
موجودہ صورتحال کا سنجیدگی سے نوٹس لیتے ہوئے انتظامیہ اور صوبائی حکومت نے سیکیورٹی کو مزید مؤثر کرنے کا فیصلہ کیا۔
اس حوالے سے ذرائع کا کہنا ہے کہ کراچی پولیس آفس کی سیکیورٹی کو اپ گریڈ کردیا گیا ہے، کے پی او جانے والے راستوں کو دیواریں کھڑی کرکے کر بند کردیا گیا۔
صدر تھانے سے کراچی پولیس آفس جانے والا راستہ بھی بند کیے جانے کے ساتھ ساتھ کے پی او میں داخلی مقام پر پولیس کی چوکی کو فعال کردیا گیا ہے۔
ذرائع کا کہنا ہے کہ کراچی پولیس آفس کے اندر مسلسل تعمیراتی کام جاری ہے، پیر کے روز سے کے پی او کو فعال کردیا جائے گا۔
مزید پڑھیں : ڈی آئی جی ساؤتھ نے کے پی او میں سیکیورٹی غفلت کے امکانات کو رد کردیا
واضح رہے کہ کراچی پولیس آفس پر حملے کے حوالے سے ڈی آئی جی ساؤتھ عرفان بلوچ نے کے پی او میں سیکیورٹی غفلت کے امکانات کو رد کردیا تھا۔
عرفان بلوچ نے بتایا تھا کہ پولیس اور دیگر اداروں کا بہترین ورکنگ کو آرڈی نیشن موجود ہے، پولیس دہشت گردوں کے سہولت کاروں کی تلاش میں چھاپے مار رہی ہے۔
میڈیا سے گفتگو کرتے ہوئے انہوں نے کہا تھا کہ کے پی او سیکیورٹی پر موجود پولیس اہلکاروں نے مزاحمت کی اور شہید ہوئے، اس کا مطلب ہے کہ سیکیورٹی میں کسی قسم کی غفلت نہیں تھی۔
