کراچی : ایف آئی اے ایمیگریشن نے پاکستانیوں کو غیر قانونی طور پر روانہ کرنے میں ملوث انسانی اسمگلر کو گرفتار کرلیا، ملزم آذربائیجان فرار ہونے کی کوشش کررہا تھا۔
تفصیلات کے مطابق یونان میں تارکین وطن کی کشتی حادثے کے بعد ایف آئی اے امیگریشن نے جناح انٹر نیشنل ایئرپورٹ پر کارروائی کی۔
کارروائی کے دوران پاکستانیوں کو غیر قانونی طور پر روانہ کرنے میں ملوث انسانی اسمگلر کو گرفتار کرلیا گیا۔
ایف آئی اے حکام نے کہا کہ ایجنٹ ساجد محمود شہریوں کو غیر قانونی طور پر یورپ بھیجنے میں ملوث ہے، ملزم ایف آئی اے گجرات کو لیبیا واقعے سے متعلق درج مقدمے میں مطلوب ہے۔
حکام کا کہنا تھا کہ ملزم کو آذربائیجان فرار ہونے کی کوشش کرتے ہوئے پکڑا گیا، ملزم کواس کے شیڈول فلائٹ سے آف لوڈ کرکے حراست میں لیا گیا۔
ایف آئی اے نے کہا کہ ملزم کو مزید کارروائی کیلئے ایف آئی اے گجرات کے حوالے کیا جائے گا۔