کراچی: صارفین کی سہولت کے لیے کے الیکٹرک نے نئے کنیکشن کا حصول ڈیجیٹلائز کر دیا ہے۔
تفصیلات کے مطابق کے الیکٹرک نے صارفین کو بہترین کسٹمر سروس فراہم کرنے کے لیے اپنے آپریشنز کو خود کار اور ڈیجیٹائز کرنے کے لیے نمایاں سرمایہ کاری کی ہے۔
15 لاکھ سے زائد صارفین پہلے ہی کمپنی سے ورچوئلی رابطہ کر رہے ہیں، اب کے الیکٹرک نے نئے کنیکشنز کے حصول کا طریقہ کار ڈیجیٹلائز کر دیا ہے، یہ نیا پلیٹ فارم رہائشی، کمرشل، صنعتی اور زرعی صارفین کو نئے کنیکشن کے لیے درخواست دائر کرنے میں آسانی اور اپنی درخواست کی ریئل ٹائم ٹریکنگ کی سہولت فراہم کرے گا۔
درخواست گزار کو اس کے کیس کے بارے میں معلومات ایس ایم ایس اور ای میل کے ذریعے فراہم کی جائیں گی، ادائیگی کے لیے چالان تک رسائی بھی دستیاب ہوگی، اور منظور شدہ بینکنگ چینلز کے ذریعے ڈیجیٹل ادائیگی بھی کی جا سکے گی، 80 کلوواٹ سے زائد کے کنیکشن کی درخواست دینے والے صارفین کی معاونت کے لیے ایک نمائندہ بھی مقرر کیا جائے گا۔
ترجمان عمران رانا کا کہنا تھا کہ کے الیکٹرک کمپنی کو 2030 تک اپنے صارفین کی تعداد میں 30 فی صد تک اضافے کی توقع ہے، جس کے بعد صارفین کی تعداد 50 لاکھ تک پہنچ جائے گی۔ واضح رہے کہ اس سے قبل کے الیکٹرک نے KE لائیو ایپ اور KE واٹس ایپ سروس بھی متعارف کرائی تھی۔
