اسلام آباد : جڑوں شہروں اسلام آباد اور راولپنڈی میں موسلا دھار بارش کے بعد راولپنڈی میں رین ایمرجنسی نافذ کردی گئی۔
تفصیلات کے مطابق اسلام آباد راولپنڈی میں موسلادھار بارش ہوئی، جس کے بعد واسا راولپنڈی نے رین ایمرجنسی لگا دی اور عملے کی چھٹیاں منسوخ کردیں۔
منیجنگ ڈائریکٹر واسا نے کہا کہ ہیوی مشینری نشیبی علاقوں میں پہنچا دی گئی، منیجنگ ڈائریکٹر واسا محمد سلیم اشرف فیلڈ میں نکاسی آب کی نگرانی خود کر رہے ہیں۔
ترجمان نے بتایا کہ نالہ لئی اور نشیبی علاقوں کی مانیٹرنگ کی جاری ہےاور واسا کا عملہ فیلڈ میں موجود ہے۔
دوسری جانب چمن کوژک ٹاپ، خواجہ عمران، دوبندی، قلعہ عبداللہ میں بھی بادل برسے جبکہ پشاور اور گردونواح میں موسلا دھار بارش سے نشیبی علاقے زیرآب آگئے۔
بٹگرام میں بھی خوب بارش ہوئی جبکہ لکی مروت اور گردونواح میں بادل جم کر برسے، بادل برسنے کیساتھ چلنے والی ٹھنڈی ہوا نے سردی میں اضافہ کردیا ہے۔