اسلام آباد: چیئرمین پاکستان تحریک اںصاف (پی ٹی آئی) کے خلاف فیس بک پوسٹ سے متعلق تجزیاتی رپورٹ اسلام آباد ہائی کورٹ میں جمع کروا دی گئی۔
تجزیاتی رپورٹ وفاقی تحقیقاتی ایجنسی (ایف آئی اے) کی جانب سے عدالت میں جمع کروا گئی جس میں کہا گیا کہ فیس بک پوسٹیں جج ہمایوں دلاور کے اکاؤنٹ سے نہیں کی گئیں اور پوسٹوں کے اسکرین شارٹس کا کوئی یو آر ایل موجود نہیں۔
رپورٹمیں کہا گیا کہ فیس بک ہر پروفائل، پیج اور پوسٹ کو خود بخود ایک یو آر ایل دیتا ہے، پوسٹوں کی شناخت یو آر ایل کے بغیر اسکرین شارٹس سے ممکن نہیں، جج ہمایوں دلاور کے فیس بک اکاؤنٹ سے تمام پوسٹوں کا تفصیلی جائزہ لیا گیا۔
تجزیاتی رپورٹ کے مطابق جج کے اکاؤنٹ سے مذکورہ تین پوسٹوں میں سے ایک بھی موجود نہیں، ہمایوں دلاور کے نام سے اکاؤنٹ کا باقاعدہ یو آر ایل نمبر ہے، اکاؤنٹ 2014 میں بنا جس پر ذاتی پوسٹیں موجود ہیں۔
رپورٹ کے متن کے مطابق ایف آئی اے کو اسلام آباد ہائی کورٹ سے تین اسکرین شارٹس بھجوائے گئے، مبینہ اسکرین شارٹس میں سے 21 جولائی 2014 جبکہ ایک یکم مارچ 2014 کا تھا۔
خیال رہے کہ جج ہمایوں دلاور کی فیس بک پوسٹ سے متعلق معاملہ کل سماعت کیلیے مقرر ہے۔ اسلام آباد ہائی کورٹ کے چیف جسٹس عامر فاروق کل کیس کی سماعت کریں گے۔
