برسلز: بیلجیم کے شہر لیگئی میں مسلح شخص کی فائرنگ سے 2 پولیس اہلکاروں سمیت 3 افراد ہلاک ہوگئے، جوابی کارروائی میں حملہ آور مارا گیا۔
غیر ملکی خبر رساں ادارے کے مطابق بیلجیم کے شہر لیگئی میں مسلح شخص نے اندھا ھند فائرنگ کردی جس کے نتیجے میں 2 پولیس اہلکاروں سمیت 3 افراد ہلاک ہوگئے جبکہ 2 اہلکار زخمی بھی ہوئے تاہم حملہ آور پولیس فائرنگ سے مارا گیا۔
فائرنگ سے زخمی ہونے والے دونوں پولیس اہلکاروں کو فوری طور پر قریبی اسپتال منتقل کیا گیا جہاں انہیں طبی امداد دی جارہی ہیں، ڈاکٹرز کے مطابق دونوں اہلکاروں کی حالت خطرے سے باہر ہے۔
#BREAKING: 3 killed, including 2 police officers, after a man opens fire in the Belgian city of Liège,; 2 others injured; suspect "neutralized” pic.twitter.com/J9gOqRKVKm
— Amichai Stein (@AmichaiStein1) May 29, 2018
بیلجیم کے پراسیکیوٹر کے مطابق فائرنگ کا واقعہ لیگئی شہر کے ہائی اسکول کے نزدیک پیش آیا جب ایک حملہ آور نے پولیس اہلکاروں پر فائرنگ شروع کردی اور پھر ایک خاتون کو یرغمال بنا کر نزدیکی اسکول میں چھپ گیا۔
پولیس نے علاقے کو چاروں طرف سے گھیر کر جوابی کارروائی میں حملہ آور کو ماردیا جبکہ حملہ آور کی فائرنگ سے ایک راہگیر بھی ہلاک ہوا، واقعے کی تحقیقات کا آغاز کردیا گیا ہے۔
سینئر فیڈرل پراسیکیوٹر کا کہنا ہے کہ ہوسکتا ہے کہ دہشت گردی کا واقعہ ہو، واقعے سے متعلق جائزہ لے رہے ہیں کہ اس میں دہشت گردی کا عنصر شامل ہے یا نہیں۔
بیلجیم کے اخبار میں شائع ہونے والی خبر کے مطابق 22 سالہ مسلح شخص ’اللہ اکبر‘ کی صدائیں بلند کررہا تھا اور اس نے حال ہی میں اسلام قبول کیا تھا۔