کراچی : بہادر خاتون نے ڈکیتی کی کوشش ناکام بناتے ہوئے واردات کےدوران ڈاکو کا پستول پکڑلیا جبکہ بیٹے نے ڈاکو کو لات ماری۔
تفصیلات کے مطابق کراچی میں راشد منہاس روڈ پر خاتون نے ڈکیتی کی کوشش ناکام بنا دی، عینی شاہد نے بتایا کہ موٹر سائیکل سوار دو ملزمان فیملی سے ڈکیتی کی کوشش کر رہے تھےکہ واردات کے دوران خاتون نے ڈاکو کا پستول پکڑ لیا تھا اور خاتون کے بیٹے نے ڈاکو کو لات ماری۔
جس کے بعد شہریوں نے ایک ڈاکو کو پکڑ کر تشدد کیا، شہریوں کے پکڑے گئے ڈاکو پر تشدد کی ویڈیو منظر عام پر آگئی، شہریوں نے ڈاکو کو تشدد کے بعد پولیس کے حوالے کر دیا۔
عینی شاہد کا کہنا تھا کہ پکڑے گئے ڈاکو سے اسلحہ برآمد ہوا، تاہم دوسرا ڈاکو موقع سے فرار ہوگیا۔
دوسرے واقعے میں کراچی کےعلاقے جعفر طیار میں میں شہریوں کے تشدد سے مبینہ ڈاکوہلاک اور دوسرا فرار ہوگیا، پولیس حکام کے مطابق ڈکیتی مزاحمت پر ڈاکوؤں نے فائرنگ کرکے شہری کو زخمی کردیا تھا تاہم زخمی شہری کوطبی امدادکےلئےاسپتال منتقل کردیا ہے۔
پولیس کا کہنا تھا کہ ملزمان نے فائرنگ کے بعد فرار کی کوشش کی تو شہریوں نے ایک ڈاکو کو پکڑلیا اور تشدد کا نشانہ بنایا۔
