مانچسٹر: کرونا وائرس کے خطرے کے پیش نظر برٹش ایئر ویز نے چین کے لیے اپنی تمام براہ راست پروازوں کی منسوخی کی مدت میں اضافہ کر دیا۔
تفصیلات کے مطابق برطانوی ایئر ویز نے کرونا وائرس کے خطرے کے باعث چین کے لیے براہ راست پروازیں منسوخ کر رکھی ہیں، اب 17 اپریل تک کوئی بھی براہ راست پرواز چین نہیں جائے گی۔
ترجمان ایئر لائن نے کہا کہ پروازیں منسوخ کرنے کا فیصلہ فارن آفس کی جانب سے جاری ہدایات اور وائرس سے اموات میں اضافے کے پیش نظر کیا گیا، کرونا وائرس سے اب تک 2 ہزار اموات ہو چکی ہیں، ہمارے لیے صارفین کی سیفٹی اہم ہے۔
کرونا وائرس سے متاثرہ جہاز ڈائمنڈ پرنسز کے 2 مسافر ہلاک
خیال رہے کہ کمپنی نے اس سے قبل یکم اپریل تک پروازیں منسوخ کرنے کا اعلان کیا تھا جسے اب 17 اپریل تک بڑھا دیا گیا ہے۔ ایئرلائن نے یہ بھی اعلان کیا ہے کہ ہانگ کانگ کے لیے براہ راست پروازیں جاری رہیں گی۔
واضح رہے کہ چین میں کرونا وائرس سے ہونے والی ہلاکتوں کی تعداد 2118 تک پہنچ گئی ہے، جب کہ متاثرہ افراد کی تعداد 74576 ہو چکی ہے، گزشتہ چوبیس گھنٹوں میں مہلک وائرس سے مزید 114 اموات ہوئی ہیں۔
