کراچی کے علاقے گارڈن شو مارکیٹ کے قریب بارش کے دوران بچے کو بجلی کے کھمبے سے کرنٹ لگ گیا۔
اے آر وائی نیوز کے مطابق کراچی کے علاقے گارڈن شو مارکیٹ کے قریب گزشتہ روز یہ واقعہ پیش آیا جہاں بچے کو بجلی کے کھمبے سے کرنٹ لگا تو اہل علاقہ نے اپنی مدد آپ کے تحت بچے کو بچا لیا۔
پولیس کا کہنا ہے فیملی حیدرآباد سے کراچی آئی ہوئی تھی اور انہوں نے کسی بھی قسم کی قانونی کارروائی کے لیے رجوع نہیں کیا ہے۔
پولیس کے مطابق فیملی واپس حیدرآباد روانہ ہوچکی ہے، عوام الناس سے اپیل ہے کہ وہ بارش کے دوران بجلی کے کھمبوں اور تنصیبات سے دور رہیں۔
واضح رہے کہ گزشتہ سال بوٹ بیسن تھانے کےعلاقے کلفٹن شاہ رسول کالونی میں بجلی کے پول سے کرنٹ لگنے سے 4 سالہ کمسن بچی جاں بحق ہو گئی تھی۔
بچی کو فوری طور پر جناح اسپتال منتقل کیا گیا تھا جہاں اس کی شناخت تانیہ دختر محمد اسلم کے نام سے کی گئی تھی۔
پولیس کا کہنا تھا کہ متوفیہ بچی رات ساڑھے دس بجے کے قریب گھر سے باہر ہی نکلی تھی کہ گھر کے باہر بجلی کے پول کو ہاتھ لگانے کی وجہ سے اسے کرنٹ لگ گیا اور وہ موقع پر جاں بحق ہو گئی۔
