The news is by your side.

Advertisement

اہم خبر، افغان طالبان کی چینی وزیر خارجہ سے ملاقات

بیجنگ: افغان طالبان کے اعلیٰ سطحی وفد نے چین کا دورہ کیا ہے، وفد کی قیادت ملا غنی برادر کررہے ہیں۔

ترجمان طالبان کے مطابق طالبان کا ایک اعلیٰ سطح کا وفد بیجنگ حکام سے بات چیت کے لیے چین میں موجود ہے، نو رکنی وفد کی قیادت ملاح عبدالغنی برادر کر رہے ہیں، طالبان کا وفد چینی وزیر خارجہ کی دعوت پر چین پہنچا ہے۔

ترجمان طالبان کے مطابق وفد نے چینی وزیر خارجہ سے ملاقات کی ہے، ملاقات میں امن عمل اور افغانستان کی صورتحال پر تبادلہ خیال کیا گیا۔

ترجمان کے مطابق اہم ترین ملاقات میں افغان طالبان نے چین کو یقین دلایا ہے کہ افغانستان کی سرزمین کسی بھی ملک کی سیکیورٹی کے خلاف استعمال نہیں ہوگی جبکہ چین نے بھی باور کرایا ہے کہ وہ افغانستان کے معاملات میں مداخلت نہیں کریں گے اور اس کے بجائے مسائل حل کرنے اور امن لانے میں مدد کریں گے۔

ترجمان طالبان کے مطابق وفد نے چین کے افغانستان کے لیے خصوصی سفیر سے بھی ملاقات کی اور یہ دورہ چینی حکام کی دعوت پر کیا گیا۔

چینی وزارت خارجہ نے ملاقات کی تصدیق کرتے ہوئے بتایا کہ وزیر خارجہ وانگ یی نے طالبان کے نمائندوں سے چین کے شمالی شیر تیانجن میں ملاقات کی۔

دوسری جانب ایک بیان میں افغان صدر کا کہنا ہے کہ وہ طالبان سے براہ راست مذاکرات کرنے کے لیے تیار ہیں، اشرف غنی کا کہنا تھا کہ ہم امریکا اور نیٹو کے فوجی انخلا کے فیصلے کا خیر مقدم کرتے ہیں، افغان عوام کو مستقبل کا فیصلہ خود کرنا چاہیے۔

خیال رہے کہ افغانستان سے امریکی اور غیرملکی افواج کے انخلا کے بعد صورت حال سنگین ہوچکی ہے۔

Comments

یہ بھی پڑھیں