کراچی: پی ڈی ایم اے نے سمندری طوفان بیپر جوائے کے سلسلے میں 21 واں الرٹ، جب کہ جنوب مشرقی سندھ نے 8 واں الرٹ جاری کر دیا۔
تفصیلات کے مطابق پی ڈی ایم اے کے الرٹ میں کہا گیا ہے کہ انتہائی تیز طوفان جنوب کراچی سے 310 کلو میٹر فاصلے پر ہے، یہ طوفان ٹھٹھہ سے 300 کلو میٹر، اور کیٹی بندر سے 240 کلو میٹر فاصلے پر ہے۔
پی ڈی ایم اے کے مطابق طوفن میں ہوائیں 140 سے 150، زیادہ سے زیادہ 170 کلو میٹر فی گھنٹہ کی رفتار سے چل رہی ہیں، جب کہ سمندری سطح پر درجہ حرارت 29 سے 30 سینٹی گریڈ ہے۔
پی ڈی ایم اے کا کہنا ہے کہ 15 جون تک طوفان بیپر جوائے شمال کی جانب ٹریک کرے گا، طوفان کے اطراف کی لہریں 30 فٹ کی بلندی سے چل رہی ہیں، طوفان کیٹی بندر اور بھارتی گجرات کے ساحل سے 15 جون کو ٹکرائے گا۔
محکمہ موسمیات کے مطابق کراچی میں 15 سے 17 جون تک 120 کلو میٹر کی رفتار سے ہوائیں چلیں گی، ٹھٹھہ، سجاول، بدین، تھرپارکر، میرپورخاص، عمرکوٹ اضلاع میں تیز بارش متوقع ہے، کراچی، حیدرآباد، ٹنڈومحمد خان، ٹنڈو الہٰیار، بینظیر آباد، سانگھڑ میں تیز ہوائیں اور بارش ہوگی۔ تیز ہواؤں سے کمزور، کچے مکانات، سولر پینل، اور دیگر کمزور تنصیبات کو نقصان پہنچ سکتا ہے۔
گزشتہ روز طوفان کے زیر اثر علاقوں میں ہلکی اور تیز بارش کا سلسلہ جاری رہا، کراچی، تھرپارکر 10 ملی میٹر، میرپورخاص 1 ملی میٹر، بدین 6 ملی میٹر، ٹھٹھہ 7 ملی میٹر، سجاول 17 ملی میٹر، جامشورو میں 2 ملی میٹر بارش ریکارڈ کی گئی۔
