کراچی : سمندری طوفان بیپرجوائے کراچی سے 600 اور ٹھٹھہ سے 580 کلو میٹر دور رہ گیا ، کراچی میں 13 تا 16 جون شدید بارش اور آندھی کا خدشہ ہے۔
تفصیلات کے مطابق سمندری طوفان بیپر جوئے تیزی سے پاکستان کےساحل کی جانب بڑھ رہا ہے اور کراچی سے فاصلہ کم ہو رہا ہے۔
محکمہ موسمیات کی جانب سے بیان میں کہا گیا ہے کہ سمندری طوفان کراچی کے جنوب میں 570 سے 580 کلو میٹر کے فاصلے پر ہے اور شمال کی جانب گامزن ہے، کل کے بعدطوفان شمال مشرق کی جانب بڑھے گا۔
محکمہ موسمیات کا کہنا تھا کہ سمندری طوفان کا 13 جون سے شمال مشرق کی جانب رخ ہوگا اور ٹھٹھہ ،کیٹی بندر اور بھارتی گجرات کے درمیان لینڈ فال کرے گا، جس کے باعث ٹھٹھہ ، کیٹی بندر ، بدین اوردیگرعلاقوں بارشیں ہوگی۔
محکمہ موسمیات نے بتایا سمندری طوفان کے باعث 100تا 120 کلو میٹر فی گھنٹہ کی رفتار سے ہوائیں چلنے کا امکان ہے اور طوفان جس جگہ ٹکرائے گا وہاں لہریں 8 تا 12 فٹ بلند ہوں گی۔
چیف میٹ سردارسرفراز کا کہنا تھا کہ طوفان کے باعث شہرکی ہوائیں تھمی ہوئی ہیں، شہر میں آج اور کل شدید گرمی ہوگی، پارہ 42 ڈگری سینٹی گریڈ تک بھی جاسکتا ہے تاہم کچھ مقامات پر تیز اور ہلکی بارش کا سلسلہ 16 جون تک جاری رہے گا۔