بھارت میں شادی سے واپس جاتے ہوئے خوفناک ٹریفک حادثے میں مسلمان خاندان کے افراد جاں بحق ہو گئے۔
بھارتی میڈیا کے مطابق حادثہ حیدرآباد بنگلور قومی شاہراہ پر کوتہ کوٹہ کے قریب اس وقت پیش آیا جب تیز رفتار کار ڈرائیور سے بےقابو ہو کر سڑک کنارے درخت سے جاٹکرائی۔
حادثہ رات گئے قریباً ڈھائی بجے پیش آیا اور متاثرین کو گاڑی سے نکالنے میں کافی وقت لگا۔ ریسکیو ٹیموں نے گاڑی کے دروازے توڑ کر لاشوں اور زخمیوں کو اسپتال منتقل کیا۔
جاں بحق افراد میں شیرخوار بچے اور خواتین سمیت 5 افراد شامل ہیں جب کہ 3 مزید زخمی ہیں جن کی جان بچانے کی کوشش کی جارہی ہے۔
مرنے والوں کی شناخت 7 ماہ کے یاسر، 2 سالہ بشریٰ، 5 سالہ ماریہ، 62 سالہ عبدالرحمان اور 85 سالہ سلیمہ بی بی کے نام سے ہوئی ہے۔
بدقسمت خاندان حیدرآباد میں شادی کی تقریب میں شرکت کے بعد بیلاری واپس آرہا تھا کہ حادثے کا شکار ہو گیا۔
