ریاض: سعودی عرب کی 6 کمپنیوں کو فوربز نے 30 بہترین ٹیک کمپنیوں کی فہرست میں شامل کیا ہے، فہرست میں صف اول پر موجود کمپنی مصر کی ہے۔
اردو نیوز کے مطابق فوربز نے سعودی عرب کی 6 کمپنیوں کو مشرق وسطیٰ اور شمالی افریقہ کے خطے میں سب سے اوپر 30 فن ٹیک کمپنیوں کی فہرست میں شامل کیا ہے۔
اس فہرست میں مصر 8 کمپنیوں کے ساتھ سرفہرست ہے، اس کے بعد سعودی عرب اور متحدہ عرب امارات بالترتیب 6 اور 5 کمپنیوں کے ساتھ ہیں۔
دلچسپ بات یہ ہے کہ مصر اور سعودی عرب اس فہرست میں 46 فیصد کے حصہ دار ہیں جبکہ بقیہ 7 ممالک نے 54 فیصد حصہ ڈالا۔
کویت کی 5 جبکہ اردن کی 2 فن ٹیک کمپنیاں اس فہرست میں شامل تھیں۔
پریس ریلیز میں بتایا گیا کہ فوربز نے 2022میں ڈیجیٹل چینلز کے ذریعے ان کمپنیوں کی جانب سے ادا کی گئی رقم پر غور کر کے اس فہرست کو تیار کیا۔
اس فہرست کی تیاری کے دوران فوربز کی جانب سے جن دیگر عوامل پر غور کیا گیا ان میں ایپ ڈاؤن لوڈز اور صارفین کی تعداد، جغرافیائی موجودگی، سالانہ ترقی، اختراع، اثرات، قیمتوں کا تعین اور وینچر کیپیٹلسٹ سے فنڈنگ شامل ہیں۔
بینکنگ ٹیکنالوجی اور الیکٹرانک ادائیگیوں کے لیے مصر کی فاری کمپنی 2023 کی درجہ بندی میں سرفہرست رہی، اس کے بعد اردن کی میڈ فٹکام اور یو اے ای کی اوپٹاسیہ ای پیمنٹس دوسرے نمبر پر رہی۔
