اسلام آباد: گیس کے نرخوں میں 45 فیصد سے زائد اضافے کا امکان ہے، آئی ایم ایف کو گیس کے ریٹ بڑھانے کا پلان دے دیا گیا۔
اے آر وائی نیوز کے مطابق بجلی کے بعد گیس کے نرخوں میں بھی 45 فیصد سے زائد اضافے کا امکان ہے، حکومت کی جانب سے آئی ایم ایف کو گیس کے ریٹ بڑھانے کا پلان دے دیا گیا ہے.
ذرائع کا کہنا ہے کہ آئی ایم ایف کا مطالبہ ہے کہ گیس کے ریٹ بڑھانے میں تاخیر نہ کی جائے، آئی ایم ایف نے گردشی قرض کم کرنے کے سلسلے میں رواں مالی سال کے لیے نیا پلان مانگ لیا ہے۔
آئی ایم چاہتی ہے کہ وفاقی کابینہ جولائی کے آخر تک گردشی قرض مینجمنٹ پلان 2024 منظور کرے، ذرائع کے مطابق گردشی قرض مینجمنٹ پلان 2023 کے ساتھ حکومتی اداروں کی کارکردگی کا مکمل جائزہ نہیں لیا جا سکتا۔
ذرائع کا کہنا ہے کہ نئے پلان میں گردشی قرض کے 392 ارب روپے ادا کرنے کے لیے اقدامات لیے جائیں گے۔
آئی ایم ایف کے مطابق بجلی کے گردشی قرض کے حجم کو 2374 ارب روپے پر روکا جائے، پاور ہولڈنگ کمپنی کےقرض کی ادائیگی کے لیے 10 سال کا منصوبہ بنایا جائے۔
ذرائع نے بتایا کہ آئی ایم ایف کی شرائط ہے کہ رواں مالی سال سے مقامی اور درآمدی گیس کے لیے اوسط قیمت والا ٹیرف اختیار کیا جائے جب کہ سوئی کمپنیوں کے گیس نقصانات کو روکنے کا طریقہ کار تیار کرنے کا بھی کہا گیا ہے۔
