سوشل میڈیا پر وائرل ٹرینڈ میں ہر کوئی اپنا حصہ ڈال رہا ہوتا ہے، اس طرح یہ نہ صرف مزید وائرل ہوتا ہے بلکہ حصہ ڈالنے والے کے اپنے ویوز بھی بڑھتے ہیں، لیکن انسٹاگرام پر ایک ٹرینڈ ایسا بھی ہے جو آپ کی ذاتی معلومات لیک بھی کر سکتا ہے۔
انڈیا ٹوڈے کی رپورٹ کے مطابق اگر آپ انسٹاگرام اکاؤنٹ استعمال کرتے ہیں تو ہوشیار ہو جائیں کیوں کہ انسٹاگرام کی دنیا کا یہ وائرل ٹرینڈ آپ کی ذاتی معلومات کو ہیکرز تک پہچانے کا کام کر رہا ہے۔
23 دسمبر کو سائبر سیکیوریٹی ماہر ایلیانا شیلوہ نے ایک ویڈیو میں انسٹاگرام کے وائرل ٹرینڈ ’گیٹ ٹو نو می‘ کا حصہ بننے والوں کو خبردار کیا ہے، یہ ویڈیو ڈیڑھ ملین سے زیادہ لوگوں نے دیکھی، جس میں بتایا گیا کہ اگر کوئی اس ٹرینڈ کا حصہ بننا چاہتا ہے تو فوری طور پر اپنا ارادہ ترک کر دے کیوں کہ اس ٹرینڈ میں پوچھے گئے سوالات کے سبب آپ ہیکرز کے ہاتھوں سائبر خطرات کا شکار ہو سکتے ہیں۔
@elshiloh literally delete rn save yourself!! #cybersecurity #hackers #instagramtrend ♬ original sound – eliana shiloh
ایلیانا شیلوہ نے خود بھی اس جال میں پھنسنے کا اعتراف کیا اور بتایا کہ اس چیلنج میں شیئر کی گئی معلومات ان کی ذاتی معلومات سے کافی حد تک مطابقت رکھتی ہیں۔
رپورٹ کے مطابق ’گیٹ ٹو نو می‘ نامی چیلنج صارفین سے عمر، قد، تاریخ پیدائش، ترجیحات، ٹیٹو، اور فوبیا جیسی ذاتی تفصیلات سے آگاہ کرنے کو کہتا ہے۔ خیال رہے کہ یہی وہ نجی اور اہم معلومات ہیں جو اکثر سیکیورٹی چیک میں استعمال ہوتی ہیں۔
