اسلام آباد : حکومت نے کفایت شعاری مہم پر عملدرآمد کیلئےکمیٹی قائم کرتے ہوئے وزارتوں اور محکموں کیلئے ہرقسم کی گاڑیوں کی خریداری اور حکومتی اخراجات پربیرون ملک علاج پر پابندی عائد کردی۔
تفصیلات کے مطابق حکومت نے کفایت شعاری مہم پر عملدرآمد کیلئےکمیٹی قائم کردی ، وزیرخزانہ کی سربراہی میں 10رکنی کمیٹی کفایت شعاری پر عملدرآمد کرائے گی۔
وزارتوں اورمحکموں کیلئے ہرقسم کی گاڑیوں کی خریداری ممنوع ہوگی تاہم ایمبولینس، اسکولوں کیلئے بسیں اور فضلہ اٹھانے والی گاڑیاں مستثنیٰ ہوں گی۔
ترقیاتی منصوبوں کیلئےازحدضروری آسامیوں کے سوا نئی آسامیوں پر پابندی اور حکومتی اخراجات پربیرون ملک علاج پر بھی پابندی عائد ہوگی۔
مخصوص ترقیاتی منصوبوں کے سوا دفاتر کیلئے نئے فرنیچر کی خریداری پر پابندی عائد ہے جبکہ غیرملکی وفود کےعلاوہ سرکاری لنچ، ڈنر، ہائی ٹی پر مکمل پابندی عائد ہوگی۔
پرنسپل اکاؤنٹنگ آفیسرز کو یوٹیلیٹی اخراجات 10 فیصد کم ، افسران کیلئے پیٹرولیم مصنوعات کا استعمال 30فیصد کم اور غیر ضروری سفر کی بجائے ویڈیو لنک سے اجلاس کرنے کی بھی ہدایت کی گئی ہے۔
