اسلام آباد : یونان میں گزشتہ روز ہونے والے کشتی حادثہ پر وزیراعظم کا پاکستانیوں کے جاں بحق ہونے پر کل یوم سوگ کا اعلان کیا ہے۔
وزیراعظم شہباز شریف نے کہا ہے کہ کل قومی پرچم سرنگوں رہے گا اور جاں بحق افرادکیلئے خصوصی دعا کی جائے گی۔
وزیراعظم نے واقعے کی تحقیقات کے لئے چار رکنی اعلی سطح کمیٹی بھی تشکیل دے دی ہے، نیشنل پولیس بیورو کے ڈائریکٹر جنرل احسان صادق کمیٹی کے چیئرمین مقرر کیے گئے ہیں۔
وزارت خارجہ کے ایڈیشنل سیکریٹری برائے افریقہ جاوید عمرانی کمیٹی کے رکن اور آزاد کشمیر پونچھ کے ڈی آئی جی ظہیراحمد ،جوائنٹ سیکریٹری ایف آئی اے بھی کمیٹی میں شامل ہیں۔
تحقیقاتی کمیٹی یونان میں کشتی ڈوبنے کے تمام حقائق جمع کرے گی، کمیٹی انسانی اسمگلنگ کے پہلو کی تحقیق اور ذمہ داروں کا تعین کرے گی۔
وزیراعظم شہبازشریف کا کہنا ہے کہ عالمی سطح پر اس مسئلے کے حل کیلئے تعاون اور اشتراک عمل کی تجاویز دی جائیں گی، فوری، درمیانی اور طویل المدتی قانون سازی کا جائزہ لیا جائے گا۔ ایسے واقعات کا سبب بننے والے افراد کو سخت سزائیں دینے کیلئے قانون سازی ہوگی۔
واضح رہے کہ کمیٹی ایک ہفتے میں رپورٹ وزیراعظم شہبازشریف کو پیش کرے گی، کمیٹی کی رپورٹ کی روشنی میں مزید کارروائی عمل میں لائی جائے گی۔
