کراچی : قائد حزب اختلاف سندھ اسمبلی حلیم عادل شیخ کا کہنا ہے کہ وزیرخارجہ بلاول بھٹو اب تک 35 ممالک کے دورے کر چکے ہیں، دوروں پر 1 ارب 75 کروڑ خرچ ہوئے ہیں۔
تفصیلات کے مطابق قائد حزب اختلاف سندھ اسمبلی حلیم عادل شیخ نے بلاول بھٹو کے دوروں پر تنقید کرتے کہا کہ وزیرخارجہ پاکستان کا دورہ کرکے واپس روانہ ہوگئے ہیں، وہ اب تک 35 ممالک کے دورے کرچکے ہیں، دوروں پر 1 ارب 75 کروڑ خرچ ہوئے ہیں۔
حلیم عادل شیخ نے اپنے بیان میں کہا کہ دوروں کا مقصد اپنی سی وی لیکر نوکری پکی کرنے کی کوشش ہے، کوئی پوچھنے والا ہے عوام کا پیسہ ضایع کیے جارہے ہیں کیا فائدہ ہوا؟
قائد حزب اختلاف سندھ نے سوال کیا کہ وزیرخارجہ نے یا ان کی وزارت نے ارشد شریف کیس پر کیا کیا؟ کینیا حکام سے یاں سفیر کو بلاکر احتجاج یا جواب طلبی کی؟
ان کا کہنا تھا کہ ارشد شریف دبئی چھوڑگئے کیا وزارت خارجہ نے دبئی حکومت سے پوچھا ارشد شریف کو ویزا کیوں نہیں دیا گیا؟ وزارت خارجہ ارشد شریف معاملے پر بتائے کیا پیش رفت کرسکے ہیں۔
