لاہور: سیکیورٹی اداروں نے لاہور میں دہشت گردی کا الرٹ جاری کردیا اور کہا ہے کہ افغانستان سے دو خودکش بمبار لاہور میں داخل ہوگئے، سیکیورٹی سخت کردی جائے۔
اطلاعات کے مطابق سیکیورٹی ادارے کے الرٹ میں کہا گیا ہے کہ پنجاب کے دارالخلافہ لاہور میں دہشت گردی کی بڑی کارروائی کا خدشہ ہے، افغانستان سے دو دہشت گرد لاہور میں داخل ہوچکے ہیں، قانون نافذ کرنے والے ادارے اپنی سیکیورٹی مزید سخت کردیں تاکہ دہشت گرد کو کارروائی سے روکا جاسکے۔
اے آر وائی نیوز لاہور کے نمائندے بابر خان نے بتایا کہ سیکیورٹی ادارے نے الرٹ میں بتایا ہے کہ لاہور میں داخل ہونے والے دونوں دہشت گرد کم سن ہیں اور ان کی عمریں 10 تا 12 سال ہیں جو کسی اسکول یا سرکاری عمارت کو نشانہ بناسکتے ہیں۔
رپورٹر کے مطابق لاہور میں سیکیورٹی حکام اس ضمن میں روزانہ اجلاس منعقد کررہے ہیں اور متعدد اسکولوں کی انتظامیہ کو بھی سیکیورٹی سخت کرنے کی ہدایت دی ہے۔
