اسلام آباد : عدالت نے خاتون جج دھمکی کیس میں چیئرمین پی ٹی آئی عمران خان کے ناقابل ضمانت وارنٹ گرفتاری کل تک معطل کر دیئے۔
تفصیلات کے مطابق سیشن کورٹ میں خاتون جج دھمکی کیس میں پی ٹی آئی چیئرمین عمران خان کے ناقابل ضمانت وارنٹ کے فیصلے پر نظرثانی اپیل پر سماعت ہوئی۔
عمران خان کے وکلاعلی بخاری اور فیصل چوہدری عدالت میں پیش ہوئے ، وکیل فیصل چوہدری نے عدالت کو بتایا کہ اسلام آباد ہائیکورٹ میں عمران خان کی 7 ضمانت کی درخواستوں کو منظور کیا گیا ، ضمانت کی درخواستوں کو عمران خان سے سکیورٹی واپس لیئے جانے کے باعث منظور کیا گیا۔
وکیل کا کہنا تھا کہ عمران خان سے سابق وزیراعظم کی سکیورٹی بھی واپس لے لی گئی ، ہائیکورٹ نےبھی عمران خان سے سیکورٹی واپس لیئے جانےپر تفصیلات طلب کی ہیں۔
فیصل چوہدری نے مزید کہا کہ عمران خان کے ناقابل ضمانت وارنٹ کے فیصلے میں قانونی خامیاں ہیں ، ناقابل ضمانت وارنٹ گرفتاری معطل نہیں ہوتے تو لاہور جیسی صورتحال ہوگی۔
سیشن جج سکندر خان نے عمران خان کے وارنٹ گرفتاری کل تک معطل کر دیئے اور فریقین کو نوٹسز جاری کرتے ہوئے سماعت کل تک ملتوی کردی۔
یاد رہے گذشتہ روز ڈسٹرکٹ اینڈسیشن کورٹ نے خاتون جج کو دھمکی دینے کے کیس میں چیئرمین پی ٹی آئی عمران خان کے ناقابل ضمانت وارنٹ گرفتاری جاری کردیے تھے اورعمران خان کو 18 اپریل کو عدالت پیش کرنے کا حکم دیا تھا۔
