ایپل کمپنی کی جانب سے 2023 میں آئی فون 15 سیریز کو متعارف کرایا جائے گا تاہم ابھی تک یہ واضح نہیں ہوسکا کہ کب یہ اسمارٹ فونز صارفین کیلئے دستیاب ہوں گے۔
غیرملکی خبر رساں ادارے کی رپورٹ کے مطابق ایپل کی جانب سے عموماً ستمبر کے مہینے میں نئے آئی فونز متعارف کرائے جاتے ہیں، تو زیادہ قوی امکان یہی ہے کہ آئی فون 15، 15 پلس، 15 پرو اور 15 پرو میکس (یا آئی فون 15 الٹرا) ستمبر میں متعارف کرائے جائیں گے۔
ایپل کمپنی کی جانب سے آئی فون 15 سیریز متعارف کرنے کے ایونٹ کا اعلان ممکنہ طور پر اگست میں کیا جائے گا مگر کمپنی کے ماضی کے ایونٹس دیکھ کر یہ اندازہ لگایا جاسکتا ہے کہ ستمبر کی کس تاریخ کو یہ فون پیش کیے جا سکتے ہیں۔
ایپل کی جانب سے عموماً ستمبر کے پہلے یا دوسرے ہفتے میں نئے آئی فونز متعارف کرائے جاتے ہیں اور اکثر منگل کا دن منتخب کیا جاتا ہے لیکن کبھی کبھار بدھ کو بھی نئی ڈیوائسز پیش کی جاتی ہیں۔
،اگر آئی فون 15 سیریز 5 یا 6 ستمبر کو متعارف کرائے جاتے ہیں تو وہ صارفین کو 15 ستمبر تک دستیاب ہوں گے۔ اسی طرح 12 یا 13 ستمبر کو یہ فونز پیش کیے جاتے ہیں تو یہ مارکیٹ میں 22 ستمبر تک آجائیں گے۔
