اسلام آباد: لاہور میں جناح ہاؤس پر حملے کی ویڈیو میں ہوش رُبا مناظر اور شر پسندوں کی شرمناک گفتگو منظرِ عام پر آ گئی ہے۔
تفصیلات کے مطابق 9 مئی کے غارت گر دن پر جناح ہاؤس لاہور پر شرپسندوں نے حملہ کر کے اسے نذر آتش کر کے اجاڑ دیا تھا، اتنے دن بعد ہوش رُبا مناظر اور شر پسندوں کی شرمناک گفتگو پر مبنی اس واقعے کی ایک ویڈیو بھی سامنے آ گئی ہے۔
ویڈیو دیکھنے کے بعد معلوم ہوتا ہے کہ بغض و عناد میں سیاسی جماعت کے شر پسندوں کے شرمناک جملوں نے بھارت کو بھی پیچھے چھوڑ دیا، ویڈیو میں سُنا جا سکتا ہے کہ کیسے بے حیائی اور بے باکی سے بھارتی فلم کا ڈائیلاگ دہرایا جا رہا ہے۔
ایک شرپسند فلمی ڈائیلاگ کہہ رہا ہے ’’گھر میں گھس کر ماریں گے۔‘‘ عمارت کو آگ لگانے کے مناظر ثابت کر رہے ہیں کہ کیسے بھرپور تیاری کے ساتھ سیاسی شر پسندوں نے ایک منظم طریقے سے جناح ہاؤس کو آگ لگائی۔
جناح ہاؤس میں لائٹر کے پیٹرول سے لکڑی کے اسٹینڈ کو آگ لگانے اور صوفہ سیٹس کو آگ میں پھینک کر مزید بھڑکانے کو واضح طور پر دیکھا جا سکتا ہے۔
پاکستان سے آزادی کے طلب گار ضمیر فروشوں نے جناح ہاؤس میں شر پسندی کرتے ہوئے ’’ہم لے کے رہیں گے آزادی‘‘ کے نعرے لگا کر دشمن کو بھی خوش کر دیا، شرپسند اپنے بغض، عناد اور سیاسی شدت پسندی میں سب کچھ بھول گئے، وہ یہ بھی بھول گئے کہ اس گھناؤنے جرم کے بعد وہ قانون کی گرفت سے نہیں بچ سکیں گے۔
یہ نا قابل تردید مناظر عوام نے اپنی آنکھوں سے نو مئی کو بھی دیکھے تھے اور اب بھی دیکھ رہے ہیں، کوئی بھی من گھڑت پروپیگنڈا نہ سچ کو جھٹلا سکتا ہے اور نہ ہی حقائق کو چھپا سکتا ہے۔
