لاہور : عوام کو صاف اور حفظان صحت کے اصولوں پر تیار کی گئی اشیائے خوردو نوش کی فراہمی کیلئے پنجاب فوڈ اتھارٹی اور ٹیم سرعام کی مختلف کارخانوں اور ریسٹورنٹس میں کارروائیاں جاری ہیں۔
گزشتہ دنوں پی ایف اے کے افسران نے لاہور کے علاقوں نیلا گنبد میں بنائے جانے والے غلام رسول کے چنے، عارف چٹخارہ، پھجے کے سری پائے اور جیلا فوڈ پوائنٹ سمیت دیگر مقامات پر چھاپہ مار کارروائیاں کیں۔
اے آر وائی نیوز کے پروگرام سرعام کی ٹیم پنجاب فوڈ اتھارٹی کے عملے کے ہمراہ لاہور کے تاریخی علاقے موچی دروازے سے ملنے والی مشہور خلیفہ کی خطائی کے کارخانے پر جاپہنچی اور وہاں بننے والی اشیاء کے معیار کی جانچ پڑتال کی۔
کارخانے کے مالک نے بتایا کہ ان کی نان خطائی اپنے منفرد ذائقے اور خستہ پن کی وجہ سے مشہور ہے، میدے، چینی، خالص دیسی گھی اور باداموں سے تیار کردہ یہ خطائیاں نہ صرف پاکستان میں بلکہ بیرونِ ملک بھی پسند کی جاتی ہیں۔
اس موقع پر پنجاب فوڈ اتھارٹی اور ٹیم سرعام نے کارخانے میں کیے جانے والے حفظان صحت کے اقدامات اور صفائی ستھرائی پر اپنے مکمل اطمینان کا اظہار کیا۔
