کراچی : بے روزگارباپ نے 3بچوں سمیت خود کو آگ لگا دی ، آگ سے جھلس کر باپ اور تین بچے شدید زخمی ہوگئے ، جنہیں اسپتال منتقل کردیا گیا ہے۔
تفصیلات کے مطابق کراچی کے علاقے نارتھ کراچی میں بے روزگارباپ نے بن مآں کے تین بچوں کوآگ لگاکرخود سوزی کی کوشش کی، جس میں باپ اور تین بچے جھلس کر شدید زخمی ہوگئے۔
پولیس نے بتایا کہ جھلسنے والے بچوں کی حالت تشویش ناک ہے، جن کی جناح اسپتال بچہ وارڈ میں جان بچانے کی کوششیں جاری ہیں۔
پولیس کے مطابق واقعےمیں عارف،پانچ سالہ حوریہ، چار سالہ ایمان فاطمہ اورتین سالہ غلام حسین جھلس گئے جبکہ خودسوزی کرنےوالا عارف پھل فروش تھا۔
خود سوزی کی کوشش کرنے والے عارف نامی شخص کے سوتیلے بیٹے امان نے بتایا کہ جھلسنےوالےتینوں بچے عارف کی سگی اولاد ہیں، جھلسنے والے بچوں کی والدہ کا8 ماہ قبل انتقال ہوگیا تھا۔
امان کا کہنا تھا کہ ہمارا سوتیلا والد کوئی بھی کام نہیں کر رہا تھا، عارف اور اس کے بچے کئی ماہ سے ان کے ساتھ رہ رہے تھے، آج گھر میں کھانےکےبعد عارف بچوں کو لے کر نیچےاترا، معلوم نہیں عارف نے یہ انتہائی قدم کیوں اٹھایا۔