اسلام آباد : گورنر خیبرپختونخوا حاجی غلام علی کو تبدیل کئے جانے کا امکان ہے ،نئے گورنر خیبرپختونخوا کیلئے اویس غنی، شوکت اللہ، عالم خٹک کے نام زیر غور ہے۔
تفصیلات کے مطابق اتحادیوں نے جے یو آئی کو گورنر کے پی کی تبدیلی کیلئے منالیا ہے، ذرائع نے دعویٰ کیا ہے کہ گورنر خیبرپختونخوا حاجی غلام علی جلد تبدیل ہوں گے۔
حکومتی ذرائع کا کہنا تھا کہ نئے گورنر خیبرپختونخوا کیلئے اویس غنی، شوکت اللہ، عالم خٹک کے نام زیر غور ہے۔
پی پی، اے این پی گورنر کے پی سے متعلق تحفظات کا اظہار کر چکی ہیں، گورنر خیبرپختونخوا حاجی غلام علی کا تعلق جمعیت علمائے اسلام سے ہے۔
ذرائع نے بتایا کہ پی پی نے گورنر کے پی کا عہدہ اے این پی کو دینے کی حمایت کی تھی اور پیپلزپارٹی نے گورنر کے پی کیلئے میاں افتخار حسین کا نام تجویز کیا تھا۔
جے یو آئی نے این اے پی کو گورنر کے پی سے دستبرداری پر منایا تھا، اے این پی کی معذرت پر گورنر کے پی کا عہدہ جے یو آئی ف کو ملا تھا اور اے این پی کو مرکز میں آئینی عہدہ دینے کی یقین دہانی کرائی گئی تھی۔
ذرائع کے مطابق گورنر کے پی معاملے پر پی پی، جے یو آئی میں اختلافات پیدا ہوئے تھے،پیپلزپارٹی کو گورنر خیبرپختونخوا کی سرگرمیوں پر شدید تحفظات تھے اور پیپلزپارٹی نے گورنر کے پی پر عہدے کے غلط استعمال ، صوبائی انتظامیہ پر اثرانداز ہونے ،ٹرانسفر پوسٹنگ، ترقیاتی فنڈز اجرا کے الزامات لگائے تھے۔
