بھارت میں شیر اچانک ایک گاؤں میں گھس گیا اس کے بعد وہاں کیا ہوا اس کی ویڈیو سوشل میڈیا پر تیزی سے وائرل ہو رہی ہے۔
شیر ایک ایسا خونخوار جنگلی جانور ہے جو اگر سخت سردی میں بھی کسی انسان کے سامنے آ جائے تو وہ مارے خوف کے پسینہ پسینہ ہو جائے لیکن بھارت کے ایک گاؤں میں یہ جنگلی جانور داخل ہوا تو لوگ اسے دیکھنے کے لیے اپنے گھروں کی چھتوں پر جمع ہو گئے۔
سوشل میڈیا پر یہ ویڈیو تیزی سے وائرل ہوئی اور اس پر صارفین کی جانب سے تبصرے بھی کیے جا رہے ہیں۔
بھارتی میڈیا کے مطابق یہ واقعہ منگل کی دوپہر اتر پردیش کے پیلی بھیت ضلع کے اٹکونا گاؤں میں پیش آیا جہاں جنگل سے بھٹک کر ایک شیر داخل ہوگیا وہ ایک گوردوارے کی عمارت کی دیوار پر پہنچا۔
اپنے درمیان خونخوار جنگلی جانور کو دیکھ کر گاؤں کے رہائشی پریشان تو ہوئے لیکن ایک بڑی تعداد اسے دیکھنے کے لیے اپنے گھروں کی چھتوں پر چڑھ گئی جب کہ کچھ نوجوان منچلے گھروں سے باہر بھی آ گئے اور اپنے موبائل کیمروں سے اس کی تصاویر اور ویڈیوز بھی بنائیں۔
تاہم شیر نے اپنی روایتی خونخواری کے بجائے گوردوارے کی عمارت کی دیوار پر چہل قدمی کی اور پھر آرام سے دیوار پر بیٹھ گیا۔
اس سے قبل کہ شیر اور انسانوں کے درمیان کوئی خوفناک آنکھ مچولی ہوتی محکمہ جنگلات کی ٹیم وہاں آن پہنچی اور شیر کو بڑی مشکل سے پکڑ کر واپس اس کے اصل مقام کی جانب لے گئی۔
#WATCH | UP: A tiger entered a village in Pilibhit and climbed onto a wall earlier today
Later on, the tiger was rescued by the forest department https://t.co/LxgG3vjkcJ pic.twitter.com/kV6ixqu4vi
— ANI UP/Uttarakhand (@ANINewsUP) December 26, 2023
اسی حوالے سے ایک ویڈیو میں دیکھا جا سکتا ہے کہ محکمہ جنگلات کی ٹیم کو شیر پر قابو پانے میں کافی مشکلات کا سامنا کرنا پڑا۔ 6 سے زائد افراد پر مشتمل عملہ کافی دیر تک اسے پکڑنے کی کوشش کرتا رہا لیکن شیر ان کے قابو نہ آیا لیکن با لآخر ٹیم بلی کے اس بھانجے کو گرفتار کرنے میں کامیاب رہی۔
#WATCH | Uttar Pradesh: Forest department team rescues a tiger that entered a village in Pilibhit pic.twitter.com/E8P7V7M3Ir
— ANI UP/Uttarakhand (@ANINewsUP) December 26, 2023