وزیرخزانہ اسحاق ڈار کی زیرصدارت اقتصادی رابطہ کمیٹی کا اجلاس آج ہوگا، روس سے پٹرولیم مصنوعات کی درآمد کی اجازت دی جائے گی۔
اے آر وائی نیوز کے مطابق اقتصادی رابطہ کمیٹی کا اجلاس آج اسحاق ڈار کی صدارت میں ہوگا، جس میں روس سے پٹرولیم مصنوعات کی درآمد کی اجازت دی جائے گی، سولر پینل اینڈ الائیڈ ایکویپمنٹ مینوفیکچرنگ پالیسی 2023 کی منظوری بھی دی جائے گی۔
ای سی سی ایجنڈا کے مطابق رواں مالی سال کے لیے وزیراعظم ریلیف پیکج جاری رکھنے کی منظوری دیے جانے کا بھی امکان ہے۔
ایجنڈا کے تحت وزارت ہاؤسنگ کے لیے 47 ارب کی گرانٹ منظور کی جائے گی، 47 ارب روپے کی رقم ایس ڈی جیز کے لیے استعمال کی جائے گی۔
ایکسپورٹ پراسسنگ زونز رولز میں ترمیم کی منظوری بھی ایجنڈے کا حصہ ہے،1263 میگاواٹ کے پنجاب تھرمل پاور لمیٹڈ کو چلانے کی منظوری کا امکان ہے۔
دستاویز کے مطابق پاسکو کی گندم صوبوں اور ایجنسیز کو دینے کے لیے طریقہ کار پر بھی غور ہوگا، اٹک ریفائنری کے فریٹ چارجز سے متعلق سمری پر بھی غور کیا جائے گا۔
اس کے علاوہ گیس کے شعبے میں سرکلر ڈیبٹ کی ادائیگیوں کے سلسلے میں سمری بھی زیر غور آئے گی۔
