شمالی کوریا کی جانب سے لانچ کیا گیا جاسوس سیٹلائٹ مالگیونگ مدار میں پہنچ گیا ہے۔
غیر ملکی ذرائع ابلاغ کے مطابق گزشتہ رات خلا میں روانہ ہونے والا سیٹلائٹ مدار میں پہنچ گیا، جبکہ جاسوس سیٹلائٹ کی جانب سے یکم دسمبر سے نگرانی کا عمل شروع کردیا جائے گا۔
شمالی کوریا کے حکام کی جانب سے کہا گیا ہے کہ تھوڑے عرصے میں مزید سیٹلائٹ لانچ کرنے کا ارادہ رکھتے ہیں، اسپائے سیٹلائٹ لانچ کرنا شمالی کوریا کا جائز حق ہے۔
رپورٹس کے مطابق شمالی کوریا کے سربراہ کم جونگ ان نے اسپیس سینٹر کے دورے کے موقع پر کہا کہ شمالی کوریا مزید جاسوس سیٹلائٹ لانچ کرے گا۔
شمالی کوریا کے سربراہ کم جونگ ان کا کہنا ہے کہ نگرانی کی صلاحیتوں کو بڑھانا علاقائی سلامتی میں اہمیت کا حامل ہوگا۔ واضح رہے کہ امریکا کی جانب سے شمالی کوریا کے اسپائے سیٹلائٹ لانچ کرنے پر مذمت کی گئی ہے۔
دوسری جانب شمالی کوریا نے بھی غزہ میں جاری اسرائیلی جارحیت کے خلاف فلسطین کی حمایت کا اعلان کردیا ہے۔
غیر ملکی ذرائع ابلاغ کے مطابق شمالی کوریا کے سربراہ کم جونگ ان نے سوشل میڈیا پر شمالی کوریا اور فلسطین کا پرچم لگاتے ہوئے کیپشن میں لکھا کہ ہم فلسطین کے ساتھ ہیں۔
