سیالکوٹ میں قومی اسمبلی کے حلقے 71 میں مسلم لیگ ن کے امیدوار خواجہ آصف اور تحریک انصاف کی پہلی بار انتخابی دنگل میں اترنے والی ریحانہ امتیاز ڈار کو مضبوط امیدوار تصور کیا جارہا ہے۔
پاکستان میں عام انتخابات میں اب لگ بھگ ایک ہفتے رہ گئے ہیں ، سب حلقوں میں سیاسی گہما گہمی عروج پر ہیں ، سیالکوٹ کے قومی اسمبلی کے حلقہ این اے 71 کا شمار ان حلقوں میں ہو رہا ہے، جہاں سخت ترین مقابلہ متوقع ہے، ماضی میں اس حلقے کو این اے 73 کے نام سے جانا جاتا تھا۔
پنجاب کے ضلع سیالکوٹ کے حلقے 71 میں ویسے تو کئی امیدوار میدان میں ہیں لیکن یہاں ایک طرف مسلم لیگ ن کے امیدوار خواجہ آصف ہیں تو دوسری طرف تحریک انصاف کی حمایت یافتہ امیدوار ریحانہ امتیاز ڈار ہیں۔
مسلم لیگ ن کے خواجہ آصف 1993 سے مسلسل اس حلقے سے الیکشن لڑتے اور جیتتے رہے ہیں جبکہ تحریک انصاف کی حمایت یافتہ امیدوار ریحانہ امتیاز پہلی بار انتخابی دنگل میں اتری ہے۔
این اے 71 کے امیدواروں کی فہرست
قابل ذکر بات یہ ہیں کہ این اے 71 خواجہ آصف کا آبائی حلقہ ہے اور وہ کبھی بھی یہاں سے الیکشن نہیں ہارے۔
سال 2018 کے عام انتخابات میں اس حلقے میں خواجہ آصف کے مقابلے میں عثمان ڈار میدان میں اترے تھے، انتخابات میں خواجہ آصف اپنے مخالف امیدوار عثمان ڈار سے صرف ایک ہزار ووٹوں کی برتری سے جیتے تھے۔
عثمان ڈار نےایک لاکھ 15 ہزار 464 ووٹ لیے جب کہ خواجہ آصف ایک لاکھ 16 ہزار 957 ووٹ حاصل کئے تھے۔
خواجہ آصف اور عثمان ڈار کے درمیان اس حلقے میں پہلا مقابلہ 2008 کے انتخابات میں ہوا تھا جبکہ 2013 کے الیکشن میں، جب اس حلقے کا نمبر این اے 110 تھا، عثمان ڈار نے 71 ہزار ووٹ حاصل کیے جبکہ خواجہ آصف 92 ہزار ووٹ لے کر کامیاب قرار پائے تھے۔ تاہم عثمان ڈار نے ان کی کامیابی کو چیلنج کیا تھا۔
